सोलापूर : शहरातील श्री सिद्धरामेश्वर यात्रेच्या पार्श्वभूमीवर सोलापूर महानगरपालिकेचे आयुक्त डॉ. सचिन ओम्बासे यांनी आज होम मैदान तसेच नंदी ध्वज मिरवणूक मार्गाची पाहणी केली. यात्रेदरम्यान लाखो भाविक सहभागी होत असल्याने कोणतीही गैरसोय अथवा अपघात होऊ नये, यासाठी प्रशासन पूर्ण तयारीत असल्याचे सांगण्यात आले.
यावेळी अतिरिक्त आयुक्त संदीप कारंजे, राजशेखर हिरेहब्बू, नगर अभियंता सारिका आकूलवर, अंतर्गत लेखा परीक्षक राहुल कुलकर्णी, मनोज जाधव, सागर करोसेकर यांच्यासह अधिकारी उपस्थित होते. आयुक्तांनी मिरवणूक मार्गावरील अडथळा निर्माण करणाऱ्या झाडांच्या फांद्या तात्काळ काढण्याच्या तसेच लटकणाऱ्या टेलिफोन व विद्युत तारा सुरक्षित पद्धतीने हलविण्याच्या स्पष्ट सूचना दिल्या. यात्रेच्या काळात रात्रीच्या वेळी योग्य प्रकाशयोजना राहावी यासाठी एलईडी दिवे व अतिरिक्त प्रकाश व्यवस्था उभारण्याचे आदेश देण्यात आले. तसेच मिरवणूक मार्गावरील खड्डे, खराब रस्ते व आवश्यक दुरुस्तीची कामे तातडीने पूर्ण करण्यावर भर देण्यात आला.
होम मैदान परिसरात धार्मिक विधी व कार्यक्रमांच्या अनुषंगाने स्वच्छता, पिण्याचे पाणी, तात्पुरती शौचालये, विद्युत पुरवठा, आरोग्य सुविधा व अग्निशमन यंत्रणेची तयारी तपासून आवश्यक सुधारणा करण्याचे निर्देश देण्यात आले. सर्व विभागांनी परस्पर समन्वयाने काम करून यात्रेचे नियोजन यशस्वी करावे, असे आवाहन आयुक्तांनी केले.
सोलापूर महानगरपालिका श्री सिद्धरामेश्वर यात्रेसाठी सर्वतोपरी तयारी करत असून, भाविकांनी प्रशासनास सहकार्य करावे, असे आवाहन यावेळी आयुक्त डॉ. सचिन ओम्बासे यांनी केले.
आपत्ती व्यवस्थापन आराखड्यानुसार होम मैदानावर नियोजन करावे
दरम्यान, सोलापूर महापालिका आणि पीडब्ल्यूडी विभागाने आपत्ती व्यवस्थापन अंतर्गत सादर केलेल्या आराखडा नकाशानुसार श्री सिद्धेश्वर देवस्थान कमिटीने होम मैदान परिसरातील पाळणे, खेळणी आणि स्टॉलची रचना करावी, अशी सूचनाही यावेळी महापालिका आयुक्त डॉ. सचिन ओम्बासे यांनी केली.
