सोलापूर : महानगरपालिका सार्वत्रिक निवडणूक २०२५–२६ पारदर्शक, सुरक्षित आणि नियोजनबद्ध पद्धतीने पार पाडण्यासाठी प्रशासनाने सर्व तयारी पूर्ण केली आहे. त्याच पार्श्वभूमीवर शहरातील विविध प्रशालांमध्ये सुरू असलेल्या मतदान यंत्र (ईव्हीएम) वितरण व मतमोजणी प्रक्रियेची सोलापूर महानगरपालिका आयुक्त डॉ. सचिन ओम्बासे यांनी आज प्रत्यक्ष पाहणी केली.
महापालिका मुख्यालयातून कडेकोट पोलीस बंदोबस्तात व ऑन-कॅमेरा देखरेखीखाली मतदान यंत्रांचे वितरण करण्यात आले. या वेळी ईव्हीएम हाताळणी, वाहतूक, सुरक्षा व्यवस्था तसेच नोंदवही प्रक्रियेबाबत कोणतीही त्रुटी राहू नये, अशा स्पष्ट सूचना आयुक्तांनी संबंधित अधिकारी व कर्मचाऱ्यांना दिल्या. प्रत्येक टप्प्यावर नियमांचे काटेकोर पालन करण्यावर त्यांनी भर दिला.
यानंतर आयुक्त डॉ. ओम्बासे यांनी मेहता प्रशालेतील स्ट्रॉंग रूम व मतमोजणी कक्षाची पाहणी केली.
या पाहणीवेळी निवडणूक नियंत्रण अधिकारी तपन डंके, विभागीय अधिकारी किशोर तळीखेडे यांच्यासह संबंधित विभागांचे अधिकारी व कर्मचारी उपस्थित होते. निवडणूक प्रक्रिया शांततेत, पारदर्शक आणि नियमानुसार पार पाडण्यासाठी प्रशासन पूर्णतः कटिबद्ध असून सर्व विभागांमध्ये समन्वय साधून कामकाज सुरू असल्याचे यावेळी स्पष्ट करण्यात आले.
आवश्यक सोयीसुविधांचा सविस्तर आढावा
स्ट्रॉंग रूममधील सीसीटीव्ही देखरेख, प्रवेश नियंत्रण, सीलिंग प्रक्रिया तसेच मतमोजणी कक्षातील आसन व्यवस्था, वीजपुरवठा, अग्निशमन सुविधा आणि इतर आवश्यक सोयीसुविधांचा सविस्तर आढावा घेण्यात आला. निवडणूक प्रक्रियेत कोणतीही अडचण येऊ नये, यासाठी सर्व यंत्रणा सतर्क ठेवण्याच्या सूचना देण्यात आल्या.
