अक्कलकोट – तालुक्याशी नाळ जोडलेली असतानाच पुणे शहरात नोकरी, व्यवसाय, सामाजिक, शैक्षणिक, साहित्यिक, कला, उद्योग व विविध क्षेत्रांत उल्लेखनीय कार्य करून अक्कलकोट तालुक्याचे नाव उज्ज्वल करणाऱ्या कर्तृत्ववान व्यक्तिमत्त्वांचा गौरव सोहळा पुण्यात उत्साहात पार पडला. गावगाथा मीडिया नेटवर्कच्या वतीने आयोजित ‘अक्कलकोट भूषण व रत्न पुरस्कार सोहळा २०२६’ थाटामाटात संपन्न झाला.
पुण्यातील नितू मांडके सभागृह, स्वारगेट, टिळक रोड येथे शनिवारी सायंकाळी झालेल्या या सोहळ्यात अक्कलकोटचे आमदार सचिन कल्याणशेट्टी यांच्या हस्ते पुरस्कारांचे वितरण करण्यात आले. विविध क्षेत्रांत उल्लेखनीय योगदान देणाऱ्या एकूण १५ मान्यवरांचा यावेळी सन्मान करण्यात आला.
अक्कलकोट भूषण पुरस्काराने चार मान्यवरांचा सन्मान
अक्कलकोट भूषण पुरस्काराचे मानकरी म्हणून जन्मेजयराजे विजयसिंहराजे भोसले , मल्लिनाथ कलशेट्टी, माधव राजगुरू आणि शरणकुमार लिंबाळे यांचा गौरव करण्यात आला.
तर अक्कलकोट रत्न पुरस्काराने विविध क्षेत्रांत कार्यरत असलेल्या मान्यवरांचा सन्मान करण्यात आला. यामध्ये मा. पौर्णिमाताई गायकवाड (IPS अधिकारी), मा. बंडोपंत कुलकर्णी (जिल्हा न्यायाधीश, पुणे), महेश बोळकोटगी (वरिष्ठ पोलीस निरीक्षक), रविकांत पाटील (सहकार व साखर उद्योग क्षेत्र), विरभद्र हारकूड (संस्थापक अध्यक्ष, अक्कलकोट तालुका पुणे रहिवासी संघ), गणेश फुलारी (उद्योजक), संजीवकुमार हिळ्ळी (Cinematographer), चंद्रशेखर भांगे (पत्रकार, लोकशाही न्यूज), मा. सिद्धार्थ कापसे (युवा उद्योजक), डॉ. अमोगसिद्ध चेंडके (मराठी भाषा व संतसाहित्य अभ्यासक) आणि अॅड. सदाशिव माळगे (शैक्षणिक व सामाजिक क्षेत्र) यांचा समावेश होता.
या सोहळ्यास पुणे उपमहापौर परशुराम वाडेकर यांची प्रमुख पाहुणे म्हणून उपस्थिती लाभली.
“गावाशी नाळ घट्ट; दरवर्षी पुरस्कार सोहळा घेणार”
यावेळी बोलताना गावगाथा मीडिया नेटवर्कचे मुख्य संपादक धोंडप्पा नंदे म्हणाले, “आम्ही नोकरी-व्यवसायानिमित्त पुणे येथे वास्तव्यास असलो तरी आमची नाळ गावाच्या मातीशी घट्ट आहे. अक्कलकोट तालुक्यातील जनतेची सेवा करण्यासाठी आम्ही कटिबद्ध आहोत. पुण्यात विविध क्षेत्रांत उल्लेखनीय काम करणाऱ्या अक्कलकोटच्या भूमिपुत्रांचा गौरव व्हावा, त्यांच्या कार्याला प्रोत्साहन मिळावे आणि त्यांचे मनोबल वाढावे, या भावनेतून हा उपक्रम सुरू केला आहे. यापुढे दरवर्षी हा पुरस्कार सोहळा आयोजित करण्यात येईल.
‘समतेचा शिल्पकार महात्मा बसवेश्वर’ पुस्तकाचे प्रकाशन
या सोहळ्याचे आणखी एक वैशिष्ट्य म्हणजे प्रा. सदाशिव माळगे लिखित ‘समतेचा शिल्पकार महात्मा बसवेश्वर’ या पुस्तकाचे आमदार सचिनदादा कल्याणशेट्टी व उपस्थित मान्यवरांच्या हस्ते प्रकाशन करण्यात आले. महात्मा बसवेश्वर यांच्या समता, मानवता आणि सामाजिक परिवर्तनाच्या विचारांना जनमानसापर्यंत पोहोचविणाऱ्या या साहित्यकृतीचे प्रकाशन पुरस्कार सोहळ्याला वैचारिक अधिष्ठान देणारे ठरले.
आमदार सचिन कल्याणशेट्टीं कडून उपक्रमाचे कौतुक
आमदार सचिन कल्याणशेट्टी यांनी गावगाथा मीडिया नेटवर्कच्या या उपक्रमाचे कौतुक केले. ते म्हणाले, “गावगाथा मीडिया नेटवर्कने आयोजित केलेला हा पुरस्कार सोहळा अत्यंत स्तुत्य उपक्रम आहे. आज धोंडप्पा नंदे यांच्या माध्यमातून मला अक्कलकोट तालुक्यातील अनेक दिग्गज व्यक्तिमत्त्वे आणि उत्साही तालुकावासीयांना भेटता आले, हे माझे भाग्य आहे. पुण्यात नोकरी-व्यवसायासाठी येऊन स्वतः आर्थिक संकटांचा सामना करत असतानाही तालुक्यातील जनतेसाठी धडपडणे ही खरोखरच अभिमानास्पद बाब आहे. भल्याभल्यांना जमणार नाही असे काम गावगाथा मीडिया नेटवर्कने करून दाखवले आहे. त्यांचे आभार मानावे तितके कमीच आहेत.”
अक्कलकोटकरांना एकत्र आणणारा उपक्रम
या पुरस्कार सोहळ्यामुळे पुण्यात वास्तव्यास असलेल्या अक्कलकोट तालुक्यातील कर्तृत्ववान व्यक्तींना एकत्र येण्याची, एकमेकांच्या कार्याची ओळख होण्याची आणि त्यांच्या योगदानाचा सन्मान करण्याची संधी मिळाली. गावापासून दूर असतानाही आपल्या कार्यातून अक्कलकोटचे नाव उज्ज्वल करणाऱ्या व्यक्तिमत्त्वांचा सन्मान करण्याच्या या उपक्रमाचे उपस्थितांनी कौतुक केले.
कार्यक्रमाच्या यशस्वी आयोजनासाठी कल्याणराव मंठाळे, सोमेश्वर वाडी, डॉ. अमोगसिद्ध चेंडके, स्वामी चांगुले, संतोष राठोडे, प्रा. सदाशिव माळगे, अंबादास गवंडी आणि राहुल भंडारी यांनी संयोजक मंडळाच्या माध्यमातून परिश्रम घेतले.
या संपूर्ण पुरस्कार सोहळ्यामागे गावगाथा मीडिया नेटवर्कचे मुख्य संपादक धोंडप्पा नंदे यांची संकल्पना, पुढाकार आणि अक्कलकोटकरांना एका व्यासपीठावर आणण्याची भूमिका महत्त्वाची ठरली. अक्कलकोटच्या कर्तृत्ववान भूमिपुत्रांचा सन्मान करण्याची ही परंपरा यापुढेही कायम ठेवण्याचा निर्धार यावेळी व्यक्त करण्यात आला.
