पंढरपूर – सिंहगड पंढरपूर येथील स्थापत्य अभियांत्रिकी विभागात शिक्षक दिन उत्साहपूर्ण वातावरणात साजरा करण्यात आला. भारताचे माजी राष्ट्रपती व महान शिक्षणतज्ज्ञ डॉ. सर्वपल्ली राधाकृष्णन यांच्या जयंतीनिमित्त आयोजित या कार्यक्रमाचे आयोजन द्वितीय वर्षातील स्थापत्य अभियांत्रिकीच्या विद्यार्थ्यांनी केले.
कार्यक्रमादरम्यान विद्यार्थ्यांनी शिक्षकांप्रती असलेला आदर, प्रेम आणि कृतज्ञता आपल्या भाषणातून व्यक्त केली. शिक्षक हे विद्यार्थ्यांच्या शैक्षणिक प्रगतीसोबतच त्यांच्या व्यक्तिमत्त्व विकासामध्येही महत्त्वाची भूमिका बजावतात. शिक्षकांच्या मार्गदर्शनामुळे विद्यार्थ्यांना भविष्यातील आव्हानांना सामोरे जाण्याची प्रेरणा मिळते, अशा भावना विद्यार्थ्यांनी आपल्या मनोगतातून व्यक्त केल्या.
या कार्यक्रमादरम्यान थेट द्वितीय वर्षात प्रवेश घेतलेल्या विद्यार्थ्यांचेही उत्साहात स्वागत करण्यात आले. नव्याने विभागात प्रवेश घेतलेल्या विद्यार्थ्यांना विभागातील शैक्षणिक वातावरण, विविध उपक्रम आणि शिक्षकांचे मार्गदर्शन याबाबत माहिती देण्यात आली. या स्वागतामुळे नवीन विद्यार्थी आणि विभागातील इतर विद्यार्थी व शिक्षक यांच्यात आपुलकीचे आणि स्नेहाचे वातावरण निर्माण झाले.
विद्यार्थ्यांनी शिक्षक दिनानिमित्त उत्स्फूर्त सहभाग नोंदवत शिक्षकांप्रती कृतज्ञता व्यक्त केली. विद्यार्थ्यांनी केलेल्या आयोजनाचे कौतुक करताना स्थापत्य अभियांत्रिकी विभागाचे विभागप्रमुख डॉ. यशवंत पवार यांनी विद्यार्थ्यांचे आभार मानले. तसेच विद्यार्थ्यांनी भविष्यातही अशा उपक्रमांमध्ये सक्रिय सहभाग घ्यावा, असे आवाहन केले.
महाविद्यालयाचे प्राचार्य डॉ कैलाश करांडे, उपप्राचार्य डॉ स्वानंद कुलकर्णी, डॉ चेतन पिसे, डॉ श्रीगणेश कदम, प्राध्यापक चंद्रकांत देशमुख यांनी सदर कार्यक्रमाबद्दल विद्यार्थ्यांचे कौतुक केले.
कार्यक्रमामुळे शिक्षक व विद्यार्थी यांच्यातील स्नेहभाव अधिक दृढ झाला. शिक्षकांप्रती कृतज्ञता व्यक्त करण्यासोबतच नव्याने प्रवेश घेतलेल्या विद्यार्थ्यांचे स्वागत आणि त्यांना प्रोत्साहन देत शिक्षक दिनाचा कार्यक्रम उत्साहपूर्ण वातावरणात संपन्न झाला.
