वैराग – ग्रामीण भागातील शेती आणि घरगुती वापराच्या साधनांना धार लावून देण्याचे प्रामाणिक काम करणारे बार्शी येथील रहिवासी
नाना कांबळे यांचा “आदर्श कष्टकरी व्यक्ती” म्हणून नुकताच गौरव करण्यात आला. माजी पोलीस उपविभागीय अधिकारी नानासाहेब कदम यांच्या हस्ते शाल, श्रीफळ देऊन त्यांना सन्मानित करण्यात आले.
नाना कांबळे हे वय ६४ वर्षांचे असूनही रोज सुमारे ४० ते ४६ किलोमीटर सायकलवरून प्रवास करून गावोगावी जातात. शेतीसाठी लागणारे विळा, कोयता, खुरपे, फावडे तसेच घरगुती उपयोगातील सुरी, चाकू, कात्री आणि इतर साधनांना धार लावून ते आपला उदरनिर्वाह चालवतात.
या वयातही कसलीही तक्रार न करता सातत्याने आणि जिद्दीने मेहनत करणाऱ्या नाना कांबळे यांच्या या प्रामाणिक कष्टाची दखल घेऊन त्यांना हा सन्मान प्रदान करण्यात आला. त्यांच्या या जिद्दीचे आणि मेहनतीचे सर्व स्तरातून कौतुक होत असून, ते अनेकांसाठी एक प्रेरणास्थान ठरले आहेत.
