वैराग – बार्शी तालुक्यातील वैरागपासून अवघ्या दोन-तीन किलोमीटर अंतरावर असलेल्या मानेगाव या छोट्याशा गावाने आज आपल्या कर्तृत्वाच्या जोरावर संपूर्ण तालुक्याचे लक्ष वेधून घेतले आहे. लोकसंख्येने छोटे असले तरी या गावाने प्रशासकीय सेवेतील अधिकारी घडवण्याची मोठी परंपरा निर्माण केली असून, एकाच वेळी अनेक तरुण मोठ्या हुद्द्यांवर कार्यरत असल्याने गावाचे नाव राज्यभर गाजत आहे.
प्रशासकीय सेवेतील मानेगावची रत्ने:
गावातील अनेक तरुण आज राज्याच्या विविध भागांत महत्त्वाच्या पदांवर कार्यरत आहेत. यामध्ये प्रामुख्याने:
किरण विष्णू डाके: मुख्याधिकारी (गट-अ), तुळजापूर नगरपरिषद.
पृथ्वीराज योगीराज ताटे: सहाय्यक पोलीस निरीक्षक (API), सातारा.
मारुती भारत ताटे: संरक्षण अधिकारी, माढा.
कपिल बाळासाहेब कानडे: कर निरीक्षक, मंत्रालय, मुंबई.
बालाजी ताटे: कृषी अधिकारी, बारामती.
अविनाश सुखदेव डाके: लिपिक, कोल्हापूर न्यायालय.
सोनल चंद्रकांत कानडे: प्रकल्प अधिकारी, आदिवासी विभाग आयुक्तालय, नाशिक.
शिक्षकांचे गाव आणि अधिकाऱ्यांची खाण:
मानेगावची ओळख केवळ शेतीपुरती मर्यादित नसून, येथे शिक्षक वर्ग मोठ्या प्रमाणावर आहे. शिक्षणाचे महत्त्व ओळखून येथील पालकांनी आपल्या पाल्यांना उच्च शिक्षण दिले, ज्याचे फळ आज गावाला मिळत आहे. गावातील ९ ग्रामपंचायत सदस्यांच्या मार्गदर्शनाखाली आणि ग्रामस्थांच्या एकजुटीने गावाचा विकास होत असतानाच, दुसरीकडे प्रशासकीय पातळीवर गावातील मुले चमकत आहेत.
सुमारे १२०० ते १५०० लोकसंख्या असलेल्या या छोट्याशा गावातून एकाच वेळी क्लास-१ आणि क्लास-२ दर्जाचे इतके अधिकारी असणे, ही बाब पंचक्रोशीत कौतुकाचा विषय ठरत आहे.
गावासाठी अभिमानास्पद:
या यशाबद्दल बोलताना ग्रामस्थ व्यक्त करतात की, “आमच्या गावातून जेव्हा कोणी अधिकारी होतो, तेव्हा तो फक्त एका कुटुंबाचा नसून संपूर्ण गावाचा अभिमान असतो. वैराग सारख्या मुख्य बाजारपेठेच्या जवळ असूनही या मुलांनी आपले लक्ष विचलित होऊ न देता अभ्यासावर लक्ष केंद्रित केले, हे आजच्या तरुण पिढीसाठी प्रेरणादायी आहे.”
या सर्व अधिकाऱ्यांचे बार्शी तालुका आणि मानेगाव परिसरातून अभिनंदन होत असून, या सुपुत्रांनी आपल्या कर्तृत्वाने गावाच्या शिरपेचात मानाचा तुरा रोवला आहे.
