सोलापूर – समाजातील विधवा व एकल महिलांच्या सामाजिक, आर्थिक, शैक्षणिक, कायदेशीर आणि आरोग्यविषयक प्रश्नांवर प्रभावी उपाययोजना राबविण्यासाठी जिल्हा परिषद सोलापूरच्या यशवंतराव चव्हाण सभागृहात ‘आंतरराष्ट्रीय विधवा दिन (एकल महिला सन्मान दिन)’ निमित्त विशेष कार्यशाळेचे आयोजन करण्यात आले. मिशन वात्सल्य योजनेअंतर्गत आयोजित या कार्यशाळेत एकल महिलांच्या सक्षमीकरणासाठी शासनाच्या विविध योजनांची माहिती देण्यात आली.
कार्यशाळेचे उद्घाटन जिल्हा परिषद अध्यक्ष दीपक वैद्य यांच्या हस्ते झाले. यावेळी मुख्य कार्यकारी अधिकारी कुशल जैन, महिला व बालकल्याण समितीच्या सभापती अमृता वाघे, सदस्य चैताली मुळे, करुणा शिवशरण तसेच जिल्हा कार्यक्रम अधिकारी प्रसाद मिरकले उपस्थित होते.
दरवर्षी २३ जून हा दिवस जगभरात ‘आंतरराष्ट्रीय एकल महिला सन्मान दिन’ म्हणून साजरा केला जातो. विधवा महिलांना सन्मानाने जगण्याचा अधिकार मिळावा, त्यांच्या हक्कांचे संरक्षण व्हावे आणि शासनाच्या विविध कल्याणकारी योजनांचा लाभ त्यांच्यापर्यंत थेट पोहोचावा, या उद्देशाने हा दिवस साजरा करण्यात आला.
महाराष्ट्र शासनाने कोल्हापूर जिल्ह्यातील हेरवाड ग्रामपंचायतीच्या आदर्श उपक्रमाचा आधार घेत विधवांशी संबंधित अनिष्ट प्रथा बंद करण्याचा महत्त्वपूर्ण निर्णय घेतला आहे. त्यानुसार पुणे विभागातील सर्व ग्रामपंचायतींमध्ये आंतरराष्ट्रीय विधवा दिनानिमित्त विशेष जनजागृती व सन्मान उपक्रम राबविण्याच्या सूचना देण्यात आल्या आहेत.
या मोहिमेअंतर्गत ग्रामपंचायत स्तरावर विधवा महिलांच्या आधार, रेशनकार्ड, पेन्शन व अन्य शासकीय कागदपत्रांतील अडचणी सोडविण्यासाठी मदत केंद्रे कार्यरत ठेवण्यात येणार आहेत. बचत गटांपासून वंचित असलेल्या महिलांना ‘उमेद’ अभियानांतर्गत स्वयं-साहाय्य गटांमध्ये सहभागी होण्यासाठी प्रोत्साहन दिले जाणार आहे.जिल्हाभरातील ग्रामपंचायत, नगरपंचायत आणि तालुकास्तरीय कार्यालयांमध्ये विशेष कार्यक्रम आयोजित करून एकल महिलांच्या समस्या जाणून घेणे आणि त्यांचे तातडीने निराकरण करण्याचा संकल्प या निमित्ताने करण्यात आला.
चौकट
अमानवीय प्रथांविरोधात ग्रामसभांमध्ये ठराव
राज्य सरकारच्या प्रस्तावित एकल महिला धोरणासाठी महिलांच्या सूचना संकलित केल्या जाणार आहेत. पतीच्या निधनानंतर कुंकू पुसणे, मंगळसूत्र तोडणे, बांगड्या फोडणे किंवा महिलांना शुभकार्यांपासून दूर ठेवणे यांसारख्या अमानवीय प्रथांविरोधात ग्रामसभांमध्ये ठराव मंजूर करण्याचे आवाहन करण्यात आले आहे.
चौकट
महिलांना आर्थिकदृष्ट्या सक्षम करण्यावर भर
महिला आर्थिक विकास महामंडळ (माविम), उमेद आणि इतर विभागांच्या सहकार्याने स्वयंरोजगार व कौशल्य विकास मार्गदर्शन मेळावे आयोजित करण्यात येणार असून विधवा व एकल महिलांना आर्थिकदृष्ट्या सक्षम करण्यावर भर दिला जाणार आहे. तसेच सर्व शासकीय कार्यालयांमध्ये त्यांच्या कामांना प्राधान्य देऊन सन्मानपूर्वक वागणूक देण्याच्या सूचना संबंधित अधिकाऱ्यांना देण्यात आल्या आहेत.
