मराठी सिनेसृष्टीतील अभिनेते सतीश जोशी याचं आकस्मिक निधन सगळ्यांच्याच मनाला चटका लावून गेलंय. रंगमंचाची सेवा करत असतानाच त्यांनी जगाचा निरोप घेतला. रंगमंचावरची ही त्यांची अखेरची एक्झिट ठरली.
रविवारी सकाळी ११ वाजता मध्यांदिन ब्राह्मण सभा इथं एक छोटा प्रवेश सादर केला. त्यानंतर सतीश जोशी यांना अस्वस्थ वाटू लागलं होतं. त्यामुळं त्यांना तात्काळ हरकिसन दास हॉस्पिटलमध्ये दाखल करण्यात आलं. उपचार सुरु असताना त्यांची प्राणज्योत मालवल्याचं समोर आलं आहे.
अनेक वर्षे रंगभूमीवर काम केल्यानंतर, रंगभूमीची मनापासून सेवा केल्यानंतर, या रंगभूमीसोबत एक नातं निर्माण होतं आणि आपल्याला प्रत्यक्ष रंगमंचावरच मृत्यू यावा, अशी एक आंतरिक इच्छा निर्माण होते. अनेकदा कलाकार ती बोलूनही दाखवतात. एका कलाकाराचाअसा शेवट होणं, हे तर भाग्य…असं कलाकार मंडळी बोलताना दिसतात.
अखेरचा जय भीम…!
रंगमंचावर आयुष्याचा शेवट झालेले अनेक कलाकार मनाला चटका लावून गेले. यात सगळ्यात आधी नाव घ्यावं लागेल ते म्हणजे लोकशाहीर विठ्ठल उमप यांचं. कव्वाली असो वा अभंग…कोळीगीत असो वा लावणी…कलेच्या सर्व प्रांतात मुक्त संचार करणारे, परंपरा आणि नवता यांचा सुरेख आणि सुरेल संगम असलेले आंतरराष्ट्रीय कीर्तीचे लोकशाहीर,विठ्ठल उमप यांचं हृदयविकाराच्या तीव्र झटक्यानं रंगमंचावरच निधन झालं होतं. तेव्हा ते ८० वर्षांचे होते.
नागपूरमध्ये बुद्ध टीव्ही या वाहिनीच्या उद्घाटन कार्यक्रमात ते सहभागी झाले होते. त्यांनी रंगमंचावरच अखेरचा श्वास घेतला होता. स्टेजवर जय भीम म्हणतच त्यांनी आपला देह ठेवला होता. त्यांचा हा अखेरचा जय भीम सगळ्यांनाच चटका लावून गेला.
गिरकी घेतली अन् पडदा पडला…
असाच आयुष्याचा शेवट अभिनेत्री अश्विनी एकबोटे यांच्या वाट्यालाही आला. पुण्यातील भरत नाट्यमंदिरात प्रयोग सुरु असतानाच, हृदयविकाराच्या धक्क्यानं २०१६मध्ये त्यांची प्राणज्योत मालवली .
दरम्यान, शाहू महाराजांच्या आयुष्यावर अधारित ‘अग्निदव्य’ या नाटकात शाहू महाराजांची मुख्य भूमिका सादर करत असतानाच ३८ वर्षीय सागर शांताराम चौगुले या अभिनेत्याचा मृत्यू झाला होता.
