सिध्दनकेरी येथे शेताला रस्ता करताना शासकिय कामात अडथळा आणल्याप्रकरणी एकाविरूध्द गुन्हा दाखल
पोलिस सुत्रांनी दिलेली माहिती अशी,यातील फिर्यादी तथा सिध्दनकेरीचे तलाठी सुयश आलदर व मंडल अधिकारी कैलास शिंदे असे दोघेजण दि.22 मे रोजी तहसीलदार यांच्या आदेशान्वये सिध्दनकेरी येथील शेतकरी अंकुश कोरे गट नं.42 मध्ये जाणे येणेकरीता गट नं.36 व 45 या दोन्ही गटाच्या हद्दीमधून रस्ता जे सी बी च्या सहाय्याने करत असताना गट नं.36 चे खातेदार तथा आरोपी विठ्ठल सिद्राम कोरे हे त्या ठिकाणी दुपारी 2.00 वा. आले व जे.सी.बी.चालकास तु या ठिकाणी रस्ता करावयाचा नाही असे म्हणून रस्ता करण्यास अडथळा करून जे.सी.बी.चालकास रस्ता करण्याचे काम थांबवले.यावेळी मंडल अधिकारी व तलाठी यांनी आरोपीस तुम्ही रस्ता अडवू नका,तहसीलदार यांचा लेखी आदेश आहे असे समजावून सांगत असताना त्यांच्या अंगावर धावून येवून तुम्ही रस्ता कसा करता तेच बघतो अशी धमकी देवून सरकारी कामात अडथळा आणल्याचे दिलेल्या फिर्यादीत म्हटले आहे. याचा अधिक तपास पोलिस करीत आहेत.
दरम्यान शेती ही स्थावर मालमत्ता असून उत्पादित शेतकर्यांचा माल नेण्यासाठी रस्त्याची गरज असल्यामुळे शासन एकीकडे रस्त्यासाठी विशेष मोहिम राबवित आहे. मात्र काही शेतकरी रस्त्यासाठी आडकाठी आणून त्यांना रोखू पहात असल्यामुळे शेतकर्यांमधूनवाद विवाद घडत असल्याचे विदारक चित्र पहावयास मिळत आहे. शासनाने नुकताच नवीन आदेश काढून शेतकर्यांचा रस्ता अडविल्यास त्यांचे आधार कार्ड व शासकिय योजनांचा लाभ बंद करण्यात येईल असा इशारा देवूनही शेतकरी त्याला न जुमानता मनमानी पध्दतीने वागत असल्याने याउपरही शासनाने कडक भूमिका घेण्याची गरज व्यक्त होत आहे.
बेकायदा पिस्टल बाळगल्याप्रकरणी दोघांना चार दिवसाची पोलिस कोठडी
मंगळवेढा – मंगळवेढा शहरात बेकायदा पिस्टल बाळगल्याप्रकरणी नाना ज्ञानेश्वर जगताप(कारखाना रोड) व कृष्णा महेश खटकळे (खंडोबा गल्ली) या दोघांना पोलिसांनी अटक करून मंगळवेढा न्यायालयाचे न्यायाधीश व्ही.के. पाटील यांच्यासमोर उभे केले असता न्यायालयाने चार दिवसाची पोलिस कोठडी सुनावली आहे.
या घटनेची हकिकत अशी,दि.23 रोजी सायंकाळी 5.20 वा. मंगळवेढा शहरातील एम. आय. डी. सी. परिसरात वरील आरोपी बेकायदा पिस्टल घेवून येत असल्याची गोपनीय माहिती पोलिसांना मिळताच पोलिसांनी सदर ठिकाणी सापळा लावून वरील दोघांना पकडून अंग झडती घेतली असता दोन पिस्टल व तीन जीवंत काडतुसे मिळून आली होती. या घटनेत 1 लाख 91 हजार 800 रुपये किमतीचा मुद्देमाल जप्त करण्यात आला आहे. सदर घटनेत वरील दोघा आरोपींना तपासिक अंमलदार तथा पोलिस उपनिरिक्षक विजय पिसे यांनी अटक करून मंगळवेढा न्यायालयात उभे करून आरोपींनी पिस्टल कोठून आणले ते कशासाठी आणले,स्वतःसाठी आणले की दुसर्यासाठी आणले,जवळ बाळगण्याचा नेमका उद्देश काय? आदी मुद्दे न्यायालयासमोर मांडले असता न्यायालयाने दि.28 मे पर्यंत आरोपीस पोलिस कोठडी सुनावली आहे.दरम्यान,मागील वर्षापूर्वीही याच परिसरात बेकायदा पिस्टल बाळगल्याप्रकरणी कारवाई करण्यात आली होती.
