बार्शी – शहर पोलीस ठाणे हद्दीत एका १७ वर्षीय अल्पवयीन बालिकेचा बालविवाह होणार असल्याची गोपनीय माहिती प्राप्त होताच बार्शी शहर पोलिसांनी तात्काळ कारवाई करत बालविवाह रोखून बालिकेचे संरक्षण करण्यात यश मिळविले. या संवेदनशील आणि कौतुकास्पद कारवाईमुळे एका अल्पवयीन मुलीचे भविष्य सुरक्षित झाले आहे.
रविवार दि. ३१ मे २०२६ रोजी सकाळी १० वाजण्याच्या सुमारास बालविवाह होणार असल्याची माहिती विशेष बाल पोलीस पथकाचे प्रमुख तथा उपविभागीय पोलीस अधिकारी संकेत देवळेकर आणि बार्शी शहर पोलीस ठाण्याचे वरिष्ठ पोलीस निरीक्षक बालाजी कुकडे यांना व्हॉट्सॲपद्वारे प्राप्त झाली.
माहिती मिळताच उपविभागीय पोलीस अधिकारी संकेत देवळेकर यांनी या प्रकरणाची अत्यंत गांभीर्याने दखल घेत तात्काळ आवश्यक सूचना व आदेश दिले. बालिकेचे संरक्षण आणि बालविवाह रोखण्यासाठी कोणतीही वेळ न दवडता त्वरित कारवाई करण्याचे निर्देश त्यांनी संबंधित पथकाला दिले.
वरिष्ठ अधिकाऱ्यांच्या मार्गदर्शनाखाली अवघ्या अर्ध्या तासात विशेष पथक घटनास्थळी रवाना करण्यात आले. या कारवाईत पोलीस उपनिरीक्षक अभय माकणे, पोहेकॉ. अमोल माने, पोकॉ. राऊत, महिला पोलीस कॉन्स्टेबल श्रीमती माने तसेच इतर पोलीस अधिकारी आणि कर्मचाऱ्यांनी अत्यंत तत्परता, संवेदनशीलता आणि कर्तव्यदक्षता दाखवत महत्त्वपूर्ण भूमिका बजावली.
पोलीस पथकाच्या वेळेवर झालेल्या हस्तक्षेपामुळे बालविवाह रोखण्यात यश आले असून संबंधित अल्पवयीन बालिकेचे संरक्षण करण्यात आले आहे. बालविवाहासारख्या सामाजिक अनिष्ट प्रथेविरोधात पोलिसांनी दाखविलेली ही तत्परता समाजासाठी प्रेरणादायी ठरत आहे.
बालकांच्या हक्कांचे संरक्षण, त्यांच्या शिक्षणाचा व सुरक्षित भविष्याचा मार्ग खुला करण्यासाठी करण्यात आलेल्या या उल्लेखनीय कार्यवाहीबद्दल उपविभागीय पोलीस अधिकारी संकेत देवळेकर, वरिष्ठ पोलीस निरीक्षक बालाजी कुकडे, पोलीस उपनिरीक्षक अभय माकणे तसेच संपूर्ण पोलीस पथकाचे सर्व स्तरातून कौतुक होत आहे.
