सोलापूर : शहराच्या सांस्कृतिक वैभवाचा महत्त्वाचा भाग असलेल्या हुतात्मा स्मृती मंदिराची महापौर विनायक कोंड्याल यांनी मंगळवारी प्रत्यक्ष पाहणी करून आवश्यक दुरुस्तीची कामे तातडीने हाती घेण्याच्या सूचना संबंधित अधिकाऱ्यांना दिल्या. स्टेज, हॉल, मेकअप रूम अन् स्वच्छतागृहांच्या दुरुस्तीचे आदेश दिले. स्वच्छता, स्क्रॅप साहित्य हटविणे आणि तत्काळ करता येणारी कामे उद्यापासून सुरू करण्याचे निर्देश महापौरांनी दिले.
यावेळी उपमहापौर ज्ञानेश्वरी देवकर, स्थायी समिती सभापती रंजीता चाकोते, सभागृह नेते नरेंद्र काळे, माजी महापौर श्रीकांचना यन्नम, अतिरिक्त आयुक्त वीणा पवार, नगरसेवक सात्विक बडवे, बिज्जू प्रधाने, सहाय्यक आयुक्त युवराज गाडेकर, नगर अभियंता नीलकंठ मठपती, कार्यकारी अभियंता राजेश परदेशी, व्यवस्थापक शिवकुमार धनशेट्टी, प्रशांत बडवे, दादा साळुंखे, आशुतोष नाटकर आदी उपस्थित होते. हुतात्मा स्मृती मंदिरात नियमितपणे सांस्कृतिक, सामाजिक आणि शासकीय कार्यक्रम होत असल्याने नागरिक व आयोजकांना अधिक चांगल्या सुविधा मिळाव्यात या उद्देशाने ही पाहणी करण्यात आली. स्टेज, स्टेजखालील हॉल, मेकअप रूम, कार्यालय, स्वच्छतागृहे, खुर्च्या, पडदे, साऊंड सिस्टिम तसेच विद्युत सुविधांची पाहणी करण्यात आली. दुरावस्थेतील खुर्च्या बदलणे, मेकअप रूम व स्वच्छतागृहांमध्ये सुधारणा करणे, स्टेज व हॉलची दुरुस्ती तसेच साऊंड सिस्टिम सक्षम करण्याच्या सूचना महापौरांनी दिल्या.पूर्वीचे हुतात्मा आणि आताचे हुतात्मा स्मृती मंदिर यामध्ये फरक आहे. महापालिकेकडून शक्य तेवढा देखभाल खर्च केला जात आहे मात्र काही प्रमाणात देखभालीचा अभाव राहिला आहे. तो पूर्णपणे भरून काढण्याचा प्रयत्न केला जाईल. हे जुने नाट्यगृह सोलापूरचे वैभव असून ते जपले पाहिजे, असेही महापौरांनी स्पष्ट केले.
बीओटीपेक्षा महापालिकेच्या
ताब्यात ठेवण्याचा विचार
हुतात्मा स्मृती मंदिर बीओटी तत्त्वावर देण्याबाबत विचारणा केली असता महापौर कोंड्याल यांनी सध्या महापालिकेच्या ताब्यातच ठेवून त्याचा योग्य पद्धतीने विकास करण्याला प्राधान्य असल्याचे संकेत दिले. बीओटीवर दिल्यास व्यावसायिक दर आकारले जातील. सध्या महापालिका नागरिकांकडून नाममात्र भाडे आकारते आणि ‘नो लॉस, नो प्रॉफिट’ तत्त्वावर हे नाट्यगृह चालविले जाते. त्यामुळे नाट्य कलावंतांशी चर्चा करून पुढील निर्णय घेण्यात येईल, असे महापौरांनी स्पष्ट केले.
रिनोव्हेशननंतर कुशल मनुष्यबळ
नाट्यगृहासाठी तज्ज्ञ आणि कुशल कामगारांची आवश्यकता असल्याचा मुद्दाही यावेळी उपस्थित करण्यात आला. त्यावर महापौरांनी रिनोव्हेशननंतर व्यवस्थापनाकडून ज्या-ज्या मनुष्यबळाची मागणी केली जाईल, ते उपलब्ध करून देण्याचे आश्वासन दिले. सध्या व्यवस्थापक शिवकुमार धनशेट्टी कामकाज पाहत असून ते चांगल्या पद्धतीने जबाबदारी पार पाडत असल्याचेही त्यांनी सांगितले.
कायमस्वरूपी कायापालट करण्याचा
प्रयत्न राहील : नरेंद्र काळे
सभागृह नेते नरेंद्र काळे यांनी हुतात्मा स्मृती मंदिराच्या कामासाठी निधीची कमतरता पडू दिली जाणार नसल्याचे स्पष्ट केले. वारंवार दुरुस्तीची कामे करण्याऐवजी एकदाच दर्जेदार काम करून नाट्यगृहाचा कायमस्वरूपी कायापालट करण्याचा प्रयत्न राहील. तातडीची स्वच्छता व इतर कामे उद्यापासून सुरू होतील. त्यानंतर उपलब्ध निधी आणि आवश्यक अतिरिक्त निधीचा आढावा घेऊन नियोजन केले जाईल, असे काळे यांनी सांगितले.
——–
