सोलापूर – जिल्हा परिषदेचे मुख्य कार्यकारी अधिकारी कुलदीप जंगम यांची पिंपरी-चिंचवड येथे अप्पर आयुक्तपदी बदली करण्यात आली आहे. त्यांच्या जागी युवा आयएएस अधिकारी कुशल जैन यांची नियुक्ती होत असून, जिल्हा परिषदेच्या प्रशासनात आता नव्या नेतृत्वाची सुरुवात होत आहे.
कुलदीप जंगम यांनी सोलापूर जिल्हा परिषदेत आपल्या कार्यकाळात प्रशासनाला गती देत विविध विकासकामांमध्ये महत्त्वपूर्ण योगदान दिले. विशेषतः आपत्कालीन परिस्थितींमध्ये त्यांनी दाखवलेली तत्परता आणि समन्वय कौशल्य उल्लेखनीय ठरले. पूरपरिस्थितीच्या काळात त्यांनी केलेले नियोजन, मदतकार्याची अंमलबजावणी आणि विविध यंत्रणांमध्ये साधलेला समन्वय यामुळे नागरिकांना मोठा दिलासा मिळाला होता. त्यांच्या नेतृत्वाखाली जिल्हा परिषदेच्या अनेक योजनांना गती मिळाली आणि प्रशासन अधिक परिणामकारक झाले.
जंगम यांच्या कार्याची दखल राज्य शासनाने घेत त्यांना ‘सेवा कर्म पुरस्कार’ देऊन गौरविण्यात आले होते. त्यांच्या बदलीमुळे जिल्हा परिषदेतील एक सक्षम आणि अनुभवी अधिकारी पुढील जबाबदारीकडे जात असल्याची भावना व्यक्त केली जात आहे. पिंपरी-चिंचवड येथे अप्पर आयुक्त म्हणून ते नवे आव्हान स्वीकारणार असून, त्यांच्या अनुभवाचा तेथेही उपयोग होईल, अशी अपेक्षा आहे.
दरम्यान, सोलापूर जिल्हा परिषदेच्या मुख्य कार्यकारी अधिकाऱ्यांची धुरा आता युवा आयएएस अधिकारी कुशल जैन यांच्या हाती येणार आहे. २०२१ च्या नागरी सेवा परीक्षेत अखिल भारतीय स्तरावर ४० वा क्रमांक मिळवत त्यांनी प्रशासकीय सेवेत प्रवेश केला. शैक्षणिकदृष्ट्या ते माहिती तंत्रज्ञान क्षेत्रातील पार्श्वभूमी असलेले अधिकारी असून, बंगळुरू येथील आर. व्ही. कॉलेज ऑफ इंजिनिअरिंगमधून त्यांनी इन्फॉर्मेशन सायन्स अँड इंजिनिअरिंगमध्ये पदवी घेतली आहे. नागरी सेवेत येण्यापूर्वी त्यांनी मायक्रोसॉफ्ट इंडियामध्ये सुमारे दीड वर्ष कामाचा अनुभव घेतला आहे. त्यामुळे प्रशासनात आधुनिक तंत्रज्ञानाचा वापर करून कार्यपद्धती अधिक सक्षम करण्याची त्यांची क्षमता मानली जाते. २०२२ बॅचचे आयएएस अधिकारी असलेल्या जैन यांना सुरुवातीला आंध्र प्रदेश कॅडर मिळाले होते; मात्र २०२३ मध्ये त्यांनी महाराष्ट्र कॅडरच्या आयपीएस अधिकारी वृष्टी जैन यांच्याशी विवाह केल्यानंतर आंतर-कॅडर बदलीद्वारे महाराष्ट्र कॅडर स्वीकारले.
सध्या ते गडचिरोली जिल्ह्यातील अहेरी येथे उपविभागीय अधिकारी (एसडीओ) म्हणून कार्यरत असून, यापूर्वी रायगड जिल्ह्यातील रोहा येथे सहाय्यक जिल्हाधिकारी म्हणून त्यांनी काम पाहिले आहे. दुर्गम आणि संवेदनशील भागात काम करण्याचा त्यांना अनुभव असल्याने सोलापूरसारख्या मोठ्या जिल्ह्यातील प्रशासन हाताळताना त्याचा उपयोग होण्याची शक्यता आहे. कुलदीप जंगम यांच्या अनुभवी नेतृत्वानंतर आता कुशल जैन यांच्या रूपाने युवा, तांत्रिक दृष्टिकोन असलेले नेतृत्व सोलापूर जिल्हा परिषदेला लाभत आहे. त्यामुळे आगामी काळात विकासकामांना वेग मिळून प्रशासनात नव्या कार्यशैलीचा अवलंब होईल, अशी अपेक्षा व्यक्त केली जात आहे.
