किनवट – तहसील कार्यालयाच्या आवारातून चोरीस गेलेला मुद्देमाल अवघ्या काही दिवसांत शोधून काढत किनवट पोलिसांनी तत्परतेचे दर्शन घडविले. या कारवाईत आरोपीस अटक करून संपूर्ण मुद्देमाल हस्तगत करण्यात आला आहे.
दि. 21 मार्च 2026 रोजी पोलिस स्टेशन किनवट येथे गु.र. नं. 58/2026, कलम 303(2) भारतीय न्याय संहिता अंतर्गत गुन्हा दाखल करण्यात आला होता. नायब तहसीलदार चंद्रशेखर सहारे यांनी दिलेल्या तक्रारीनुसार, तहसील कार्यालयाच्या वाल कंपाऊंडमधील खुल्या जागेत ठेवलेला जप्तीतील लोडींग ऑटो (अंदाजे किंमत 30 हजार रुपये) तसेच त्यामध्ये भरलेली 1/2 ब्रास रेती (1,500 रुपये) असा एकूण 31,500 रुपयांचा मुद्देमाल अज्ञात चोरट्यांनी लंपास केला होता.
या प्रकरणाचा तपास पोलिस हेडकॉन्स्टेबल दिलीप श्रीमनवार यांनी हाती घेतला. पोलीस निरीक्षक गणेश कराड यांच्या मार्गदर्शनाखाली सखोल तपास करत गोपनीय माहितीच्या आधारे सोनु संजय माने (रा. गंगानगर, किनवट) यास ताब्यात घेण्यात आले. चौकशीत त्याने गुन्ह्याची कबुली दिल्यानंतर त्याच्याकडून चोरीस गेलेला संपूर्ण मुद्देमाल जप्त करण्यात आला.
आरोपीस अटक करण्यात आली असून पुढील तपास सुरू आहे. दरम्यान, किनवट पोलिसांच्या जलद व प्रभावी कारवाईमुळे परिसरात समाधान व्यक्त होत असून, पोलिसांविषयी नागरिकांचा विश्वास अधिक बळकट झाला आहे.
