सोलापूर : ईश्वर फाउंडेशन आणि एन. बी. नवले सिंहगड कॉलेज ऑफ इंजिनिअरिंग, केगाव, सोलापूर यांच्या संयुक्त विद्यमाने आयोजित ‘कोड-ए-थॉन २०२६’च्या चौथ्या पर्वाला राज्यभरातील विद्यार्थ्यांचा उत्स्फूर्त प्रतिसाद मिळाला. ११ व १२ सप्टेंबर रोजी झालेल्या या दोन दिवसीय कोडिंग स्पर्धेत विविध अभियांत्रिकी महाविद्यालयांतील सुमारे ६०० विद्यार्थ्यांनी सहभाग नोंदविला.
स्पर्धेत WITच्या संगणक अभियांत्रिकी (CSE) शाखेचा अंतिम वर्षाचा विद्यार्थी प्रशांत भूषण पांचाळ याने प्रथम क्रमांक पटकावला. VPKBIET, बारामतीच्या CSE शाखेचा अंतिम वर्षाचा विद्यार्थी साळुंके सुदर्शन नानासाहेब याने द्वितीय, तर PICT, पुणेच्या माहिती तंत्रज्ञान (IT) शाखेचा द्वितीय वर्षाचा विद्यार्थी चांदसाब मशाक उजलुमवाले याने तृतीय क्रमांक मिळविला.
विद्यार्थ्यांच्या प्रोग्रामिंग ज्ञानाबरोबरच तार्किक विचारक्षमता, समस्या सोडविण्याचे कौशल्य आणि प्रत्यक्ष कोडिंग क्षमतेची चाचणी घेण्यासाठी स्पर्धेची रचना तीन फेऱ्यांमध्ये करण्यात आली होती. पहिल्या फेरीत Programming Concepts, दुसऱ्या फेरीत Aptitude, Data Structures and Algorithms, तर तिसऱ्या आणि अंतिम फेरीत Online Coding Round घेण्यात आला. प्रत्येक फेरीतील कामगिरीच्या आधारे विद्यार्थ्यांची पुढील फेरीसाठी निवड करण्यात आली.
अंतिम फेरीत स्पर्धकांना निर्धारित वेळेत विविध प्रोग्रामिंग समस्या सोडविण्याचे आव्हान देण्यात आले. यामध्ये कोडची अचूकता, समस्या सोडविण्याची पद्धत आणि अल्गोरिदमच्या प्रभावी वापरावर विद्यार्थ्यांची कसोटी लागली. विजेत्यांना लॅपटॉप आणि गिफ्ट व्हाउचर देऊन गौरविण्यात आले, तर सहभागी विद्यार्थ्यांना प्रमाणपत्रांचे वितरण करण्यात आले.
ही स्पर्धा कॅम्पस डायरेक्टर संजय नवले यांच्या मार्गदर्शनाखाली आणि प्राचार्य डॉ. शंकर नवले यांच्या नेतृत्वाखाली यशस्वीरीत्या पार पडली. स्पर्धेच्या आयोजनात प्रा. सूरज अनिल धनवे यांनी महाविद्यालयीन समन्वयक म्हणून जबाबदारी सांभाळली. ईश्वर फाउंडेशन आणि महाविद्यालय यांच्यातील समन्वयासह स्पर्धेच्या विविध फेऱ्यांचे नियोजन व अंमलबजावणी करण्यात त्यांनी महत्त्वपूर्ण योगदान दिले.
स्पर्धेच्या यशस्वी आयोजनाबद्दल कॅम्पस डायरेक्टर संजय नवले आणि प्राचार्य डॉ. शंकर नवले यांनी ईश्वर फाउंडेशनचे समन्वयक सतीश कुरपाटी, अवधूत सोमराज, महाविद्यालयीन समन्वयक प्रा. सूरज धनवे, विजेते तसेच सहभागी विद्यार्थ्यांचे अभिनंदन केले.
अभियांत्रिकी विद्यार्थ्यांनी अभ्यासक्रमासोबतच प्रत्यक्ष कोडिंग, डेटा स्ट्रक्चर, अल्गोरिदम आणि समस्या सोडविण्याच्या कौशल्यावर भर देणे आवश्यक आहे. ‘कोड-ए-थॉन’सारख्या स्पर्धांमुळे विद्यार्थ्यांना आपले तांत्रिक कौशल्य तपासण्याबरोबरच स्पर्धात्मक वातावरणाचा प्रत्यक्ष अनुभव घेण्याची संधी मिळते, असे प्राचार्य डॉ. शंकर नवले यांनी सांगितले.
