सोलापूर – क्रीडा व युवक सेवा संचालनालय, महाराष्ट्र राज्य, पुणे अंतर्गत जिल्हा क्रीडा अधिकारी कार्यालय, सोलापूर यांच्यामार्फत दरवर्षी जिल्ह्यातील क्रीडा क्षेत्रातील उत्कृष्ट कामगिरी करणाऱ्या खेळाडूंना जिल्हा क्रीडा पुरस्काराने सन्मानित केले जाते. यंदाच्या सन २०२४-२५ मधील क्रीडा क्षेत्रातील उत्कृष्ट कामगिरीबद्दलचे ‘जिल्हा क्रीडा पुरस्कार’ जलतरणपटू श्रीकांत कोंडारे व श्रावणी सूर्यवंशी हे खेळाडू तर प्रमोद कुनगुलवार हे क्रीडा मार्गदर्शक पुरस्काराचे मानकरी ठरले आहेत.
दिनांक १५ ऑगस्ट २०२६ रोजी पालकमंत्री जयकुमार गोरे व जिल्हाधिकारी एस. कार्तिकेयन यांच्या हस्ते ध्वजारोहणाच्या मुख्य कार्यक्रमात हे पुरस्कार प्रदान केले जाणार आहेत. पुरस्काराचे स्वरूप प्रमाणपत्र, स्मृतीचिन्ह व दहा हजार रुपये रोख बक्षीस असे आहे.
पुरस्कार विजेते याप्रमाणे:
गुणवंत खेळाडू पुरस्कार (मुले) – श्रीकांत विजय कोंडारे :
- शिक्षण: बी.टेक फायनल इयर
- कामगिरी : जलतरण या खेळात उत्कृष्ट कामगिरी करत १७ राष्ट्रीय स्पर्धांमध्ये सहभाग. यामध्ये विविध प्रकारांमध्ये ०२ सुवर्ण, ०३ रौप्य, ०२ कांस्य पदके प्राप्त . अखिल भारतीय आंतर विद्यापीठ स्पर्धेत १ सुवर्ण व १ रौप्य पदकासह दोन पदके मिळवली असून, वरिष्ठ राष्ट्रीय स्पर्धेत ३ पदके आणि शालेय राष्ट्रीय स्पर्धेत ७ पदके मिळवली. एकूण २७ पदके प्राप्त.
गुणवंत खेळाडू पुरस्कार (मुली ) – श्रावणी प्रताप सूर्यवंशी :
- शिक्षण: बी.एस.सी. स्पोर्ट्स सायन्स.
- कामगिरी: जलतरण खेळात एकूण ८ आंतरराष्ट्रीय स्पर्धांमध्ये सहभाग घेऊन ०२ सुवर्णपदक, ०४ रौप्यपदक, ०२ कांस्य पदके प्राप्त केली आहेत. तसेच वरिष्ठ राष्ट्रीय ४ क्रीडा स्पर्धेत सहभाग घेऊन ४ सुवर्णपदक, १ रौप्य व ५ पदके मिळवली आहेत. शालेय राष्ट्रीय स्पर्धेत विविध प्रकारांमध्ये ८ सुवर्णपदक, १ रौप्यपदक, १ कांस्य पदक अशी एकूण १० पदके प्राप्त.
गुणवंत क्रीडा मार्गदर्शक पुरस्कार – प्रमोद वसंत कुनगुलवार :
- शिक्षण: बी.ए.एम.पी.एड. (हँडबॉल राष्ट्रीय व ऑल इंडिया खेळाडू)
- कामगिरी : १९९२ मध्ये हँडबॉल खेळाची सुरुवात केली. २००६ पासून ते दयानंद काशिनाथ आसावा प्रशाला येथे क्रीडा शिक्षक म्हणून कार्यरत असून, तेथे त्यांची १९ वर्षांची सेवा पूर्ण. त्यांनी केलेल्या मार्गदर्शनमुळे ‘आदित्य प्रधान’ या खेळाडूची आंतरराष्ट्रीय हँडबॉल स्पर्धेसाठी निवड झाली होती, ज्याने मागील वर्षी अमान (जॉर्डन) येथे आंतरराष्ट्रीय स्पर्धा खेळली आहे. त्यांनी आतापर्यंत ९० ते १०० राज्य व राष्ट्रीय हँडबॉल खेळाडू घडवले असून, त्यांचे अनेक खेळाडू आर्मी, सीआयसीएफ, पोलीस उपनिरीक्षक, पोलीस हवालदार व क्रीडा शिक्षक म्हणून कार्यरत.
- ——–
