वैराग – धकाधकीच्या आयुष्यातून स्वतःसाठी थोडा वेळ काढून निसर्गाच्या कुशीत मनसोक्त जगण्याचा आनंद ‘एकता महिला मंच’च्या सदस्यांनी लुटला. वैराग येथील ‘प्रशांजली ॲग्रो टुरिझम’ मध्ये आयोजित करण्यात आलेल्या ‘वन डे फुल्ली एन्जॉय ट्रिप’मध्ये महिलांनी विविध खेळ, गाणी आणि गप्पांच्या मैफिलीत आपला दिवस उत्साहात साजरा केला. या कार्यक्रमाला सोलापूर जिल्ह्याच्या उपजिल्हाधिकारी मा. सौ. अंजली मरोड यांची प्रमुख उपस्थिती लाभली.
महिलांनी घर आणि चूल या पलीकडेही जगावे: अंजली मरोड
यावेळी उपस्थित महिलांना मार्गदर्शन करताना उपजिल्हाधिकारी अंजली मरोड म्हणाल्या की, “ग्रामीण भागातील महिलांनी केवळ घर आणि चूल यापुरते मर्यादित न राहता आपल्या हक्काचा आनंद घेतला पाहिजे. स्वतःच्या आयुष्यासाठी वेळ काढून जगण्याची नवीन उमेद निर्माण करणे आवश्यक आहे. एकता महिला मंचने आयोजित केलेला हा उपक्रम कौतुकास्पद असून, अशा कार्यक्रमांमुळे महिलांच्या आत्मविश्वासात वाढ होते.” येणाऱ्या काळातही ‘प्रशांजली ॲग्रो टुरिझम’च्या माध्यमातून महिलांना सवलतीच्या दरात सोयी उपलब्ध करून देण्याचे आश्वासनही त्यांनी यावेळी दिले.
खेळ, गाणी आणि सेल्फीचा आनंद
कार्यक्रमात महिलांसाठी संगीत खुर्ची, गाण्याच्या भेंड्या अशा विविध स्पर्धांचे आयोजन करण्यात आले होते. विजेत्या महिलांना बक्षीस देऊन गौरविण्यात आले. निसर्गरम्य वातावरणात महिलांनी पाळणे, झोका आणि कृत्रिम धबधब्यांचा मनसोक्त आनंद घेतला. ‘मड हाऊस’ (मातीचे घर) हे या सहलीचे खास आकर्षण ठरले. महिलांनी एकमेकींसोबत सेल्फी काढत आणि मनमोकळ्या गप्पा मारत आपला दिवस संस्मरणीय बनवला.
संस्थापकांचे मत
एकता महिला मंचचे प्रमुख प्रभाकर क्षीरसागर यांनी यावेळी सांगितले की, महिलांच्या कलागुणांना वाव देणे आणि त्यांना मानसिक विरंगुळा मिळवून देणे हा या ट्रिपचा मुख्य हेतू होता. ग्रामीण भागातील महिलांना एकत्र आणून त्यांना पाठबळ देण्याचे काम मंच सातत्याने करत राहील.
उपस्थित पदाधिकारी व मान्यवर
या कार्यक्रमाचे सूत्रसंचालन सुचिता कुटे यांनी केले, तर प्रास्ताविक रेश्मा मुकटे यांनी मांडले. शेवटी आशा विभुते यांनी आभार मानले.
याप्रसंगी गीतांजली जोशी, लक्ष्मी सुतार, रेश्मा मुकटे,स्वाती शिंदे,सुचिता कुटे सुनिता नवले, शामबाला सुतार, पद्मजा आवटे, राणी गवळी, सारिका जाधव,आशा विभुते,मनीषा गवळी, रत्नप्रभा गायकवाड, प्रगती कासार, वंदना कासार, रेणुका चौगुले, सुनिता जांभळे, प्रभावती साबळे, शितल दीक्षित, सुचिता कासार यांच्यासह एकता महिला मंचच्या मोठ्या संख्येने सदस्या उपस्थित होत्या.
