बार्शी – सोलापूर जिल्ह्यात अवैध व्यवसायांविरोधात सुरु असलेल्या विशेष मोहिमेअंतर्गत बार्शी तालुका पोलिसांनी मोठी कारवाई करत नागोबाचीवाडी हद्दीतील बायपास वरील एका स्पा मसाज सेंटरच्या आडून सुरु असलेला जुगार अड्डा उद्ध्वस्त केला. या कारवाईत १२ लाख ३१ हजार १०० रुपयांचा मुद्देमाल जप्त करण्यात आला असून १० जणांना ताब्यात घेण्यात आले आहे.
बार्शी तालुका ग्रामीण पोलीस ठाण्याचे पथक रात्र गस्तीवर असताना त्यांना गोपनीय माहिती मिळाली की, बार्शी-लातूर बायपास रोडवरील नागोबाचीवाडी हद्दीत असलेल्या ‘लक्झरी डिलक्स स्पा मसाज सेंटर’मध्ये पैशांची पैज लावून ‘तिरट’ नावाचा जुगार खेळला जात आहे.
माहितीची खातरजमा करुन सहाय्यक पोलीस निरीक्षक महेश माने यांच्या नेतृत्वाखालील पथकाने बुधवार दि.१० जून रोजी मध्यरात्री २.१५ वाजण्याच्या सुमारास स्पा सेंटरवर अचानक छापा टाकला. यावेळी आतमध्ये १० जण जुगार खेळताना रंगेहाथ आढळून आले.
प्राथमिक तपासात सदर जुगार अड्डा आकाश हनुमंत काशीद (रा. कसबा पेठ, बार्शी) आणि स्पा सेंटरचा व्यवस्थापक बाळू चौधरी यांच्या संगनमताने चालविला जात असल्याचे निष्पन्न झाले. मात्र पोलिसांच्या कारवाईची चाहूल लागताच बाळू चौधरी घटनास्थळावरुन फरार झाला. यावेळी आकाश हनुमंत काशीद, मतीन शेख, रामा कबाडे, शंतनू कदम, जमीर पटेल, किरण दहिहांडे, संदीप वाणी, उदय ढेरे, शाम नायकोजी (सर्व रा. बार्शी), नितीन उबाळे (रा. चिंचगाव, ता. माढा) यांना पोलिसांनी ताब्यात घेतले आहे.
पोलीसांकडून रोख, ९ महागडे मोबाईल फोन (आयफोन, सॅमसंग, व्हिवो), दोन दुचाकी, स्कार्पिओ चारचाकी वाहन असा एकूण १२,३१,१०० रुपये किंमतीचा मुद्देमाल जप्त करण्यात आला आहे.
याप्रकरणी पोलीस कॉन्स्टेबल सुरेश बिरकले यांच्या फिर्यादीवरुन महाराष्ट्र जुगार प्रतिबंधक अधिनियम कलम १२ (अ) अन्वये बार्शी तालुका पोलीस ठाण्यात गुन्हा दाखल करण्यात आला आहे. पुढील तपास पोलीस हेड कॉन्स्टेबल सोमनाथ खांडेकर हे करीत आहेत.
ही उल्लेखनीय कारवाई पोलीस अधीक्षक अतुल कुलकर्णी, अपर पोलीस अधीक्षक विजय कबाडे आणि सहाय्यक पोलीस अधीक्षक अंजना कृष्णा यांच्या मार्गदर्शनाखाली सहाय्यक पोलीस निरीक्षक महेश माने, पोहेकॉ सोमनाथ खांडेकर, पोकॉ सुरेश बिरकले, पोकॉ महंमदगौस महेदी आणि चालक लक्ष्मण चिट्टलवाड यांनी केली.
