"बालसुरक्षेसाठी दुहेरी आरोग्य कवच’; अतिसारमुक्त बालपणसह पोलिओमुक्त भविष्याकडे सोलापूरची वाटचाल

सोलापूर – पावसाळ्याच्या पार्श्वभूमीवर बालकांच्या आरोग्याचे संरक्षण करण्यासाठी जिल्हा परिषद आरोग्य विभागाने दुहेरी मोहिमेचा प्रारंभ केला आहे. ‘अतिसार थांबवा’ अभियानाद्वारे बालमृत्यू रोखण्याचा निर्धार करण्यात आला असून, त्याचबरोबर २८ जून रोजी राष्ट्रीय पल्स पोलिओ लसीकरण मोहीम राबवून पाच वर्षांखालील प्रत्येक बालकापर्यंत आरोग्यसेवा पोहोचविण्याचे नियोजन करण्यात आले आहे.

जिल्हाधिकारी एस. कार्तिकेयन व जिल्हा परिषदेचे मुख्य कार्यकारी अधिकारी कुशल जैन यांच्या मार्गदर्शनाखाली जिल्हाभर ‘अतिसार थांबवा’ मोहीम ३१ जुलै २०२६ पर्यंत राबविण्यात येणार आहे. बालकांमध्ये अतिसारामुळे होणारे मृत्यू पूर्णपणे रोखणे हे या मोहिमेचे प्रमुख उद्दिष्ट आहे. उन्हाळा आणि पावसाळ्यात वाढणाऱ्या अतिसाराच्या घटनांना प्रतिबंध घालण्यासाठी आशा स्वयंसेविका घरोघरी जाऊन शून्य ते पाच वर्षे वयोगटातील बालकांचे आरोग्य सर्वेक्षण करणार आहेत.

जिल्ह्यातील ३ उपजिल्हा रुग्णालये, १४ ग्रामीण रुग्णालये, ८२ प्राथमिक आरोग्य केंद्रे, शहरी आरोग्य केंद्रे आणि ४३३ उपकेंद्रांमधून ओआरएस व झिंक गोळ्यांचे मोफत वितरण केले जाणार आहे. तसेच प्रत्येक आरोग्य संस्थेत ‘झिंक-ओआरएस कॉर्नर’ सुरू करण्यात येणार आहेत. जिल्ह्यातील सुमारे ४ लाख ३६ हजार ५७२ बालकांना या मोहिमेचा लाभ मिळणार असून, सर्वेक्षणा दरम्यान अतिसाराची लक्षणे आढळल्यास तातडीने उपचार आणि औषधोपचार उपलब्ध करून दिले जाणार आहेत.

दरम्यान, रविवारी २८ जून रोजी राष्ट्रीय पल्स पोलिओ लसीकरण मोहीम राबविण्यासाठीही आरोग्य विभागाने व्यापक तयारी केली आहे. जिल्ह्यातील ४ लाख ३६ हजार ५७२ बालकांना पोलिओ प्रतिबंधक डोस देण्यासाठी ग्रामीण भागात ५ हजार ५७०, शहरी भागात ५७० आणि महानगरपालिका क्षेत्रात ३७३ लसीकरण बूथ उभारण्यात आले आहेत.

या मोहिमेसाठी ७ हजार २२२ कर्मचारी नियुक्त करण्यात आले असून, वैद्यकीय अधिकारी, तालुका आरोग्य अधिकारी आणि जिल्हास्तरीय पर्यवेक्षक यांच्यामार्फत देखरेख केली जाणार आहे. बसस्थानके, रेल्वे स्थानके, बाजारपेठा, विटभट्ट्या, साखर कारखाने, यात्रा आणि लग्न समारंभ स्थळांवर विशेष लसीकरण सुविधा उपलब्ध राहणार आहेत. तसेच भटक्या वसाहती व ऊसतोड कामगारांच्या वस्त्यांपर्यंत पोहोचण्यासाठी मोबाईल पथके कार्यरत राहतील. बालकांचे आरोग्य सुरक्षित ठेवण्यासाठी प्रशासन, आरोग्य यंत्रणा आणि पालक यांचा समन्वयच या दोन्ही मोहिमांच्या यशाचा खरा आधार ठरणार आहे.

कोट

सर्व बालकांना पोलिओचे दोन थेंब पाजावेत

‘एकही बालक वंचित राहू नये’ हा उद्देश डोळ्यासमोर ठेवून आरोग्य विभागाने पालकांना आवाहन केले आहे. पाच वर्षांखालील सर्व बालकांना पोलिओचे दोन थेंब पाजावेत, तसेच अतिसाराची लक्षणे दिसताच आशा सेविका किंवा जवळच्या आरोग्य केंद्राशी संपर्क साधावा, असे आवाहन जिल्हा आरोग्य अधिकारी डॉ. सतीश कोपूरवाड यांनी केले आहे.

चौकट

ठळक आकडेवारी