अक्कलकोट – कोणतेही व्यसन माणसाला प्रगतीच्या मार्गापासून दूर नेते. दारू, गुटखा किंवा सिगारेट एवढ्यापुरतेच व्यसन मर्यादित नसून कोणतीही वाईट सवय ही व्यसनाचे रूप धारण करू शकते. त्यामुळे चांगल्या विचारांच्या व सकारात्मक प्रवृत्तीच्या संगतीत राहून तरुणांनी व्यसनांपासून दूर राहावे, असे आवाहन अक्कलकोट पंचायत समितीचे विस्तार अधिकारी संजय पाटील यांनी केले.
अक्कलकोट एज्युकेशन सोसायटीचे दिवंगत चेअरमन शिवशरण खेडगी स्मृती सोहळा–२०२६ अंतर्गत आयोजित प्रबोधनपर व्याख्यान कार्यक्रमात ते प्रमुख वक्ते म्हणून बोलत होते. कार्यक्रमाच्या अध्यक्षस्थानी माजी प्रा. विरभद्र मोदी होते. यावेळी प्रभारी प्राचार्य डॉ. अंकुश शिंदे, पर्यवेक्षक प्रा. निलप्पा भरमशेट्टी यांची प्रमुख उपस्थिती होती.
प्रारंभी डॉ. गणपतराव कलशेट्टी यांनी प्रास्ताविकातून कार्यक्रमाच्या उद्देशावर प्रकाश टाकला. पुढे बोलताना संजय पाटील यांनी तरुणांना अधोगतीकडे नेणाऱ्या व्यसनांचा मार्ग टाळून वाचन, लेखन, ज्ञानार्जन आणि करिअर घडविण्याचे सकारात्मक व्यसन अंगीकारण्याचा संदेश दिला. तसेच आई-वडिलांच्या कष्टांची जाणीव ठेवून ध्येयपूर्तीसाठी सातत्याने कार्यरत राहण्याचा सल्लाही त्यांनी दिला.
अध्यक्षीय समारोपात प्रा. विरभद्र मोदी यांनी विविध उदाहरणांच्या माध्यमातून व्यसनांचे दुष्परिणाम स्पष्ट केले आणि त्यातून उद्भवणाऱ्या सामाजिक व वैयक्तिक धोक्यांविषयी मार्गदर्शन केले.
कार्यक्रमास प्रा. श्रीकांत जिड्डीमनी, डॉ. चौडप्पा आणेकर, प्रा. लक्ष्मण ढाले, प्रा. अभिजित धोत्रे, प्रा. दयानंद कोरे, प्रा. सिद्धाराम पाटील, प्रा. दीपिका दिवटे, प्रा. सरिता बानेगाव, प्रा. सुवर्णा जाधव आदी उपस्थित होते. सूत्रसंचालन प्रा. प्रकाश सुरवसे यांनी केले, तर डॉ. विठ्ठल वाघमारे यांनी आभार प्रदर्शन केले.
