सोलापूर : सोलापूर महानगरपालिका कर्मचाऱ्यांची दिवाळी यंदा अधिक गोड होणार आहे. महापालिका प्रशासनाने सानुग्रह अनुदानाच्या रकमेत ९०० रुपयांची वाढ केली असून पात्र कर्मचाऱ्यांना यंदा ४ हजार ५०० रुपये मिळणार आहेत. गेल्या वर्षी हे अनुदान ३ हजार ६०० रुपये होते. सणासाठी दिले जाणारे १२ हजार ५०० रुपयांचे अग्रिम कायम ठेवण्यात आले आहे.महापालिकेचे मुख्य लेखा व वित्त अधिकारी डॉ. रत्नराज जवळगेकर यांनी यासंदर्भात परिपत्रक काढले आहे.
महापालिका आयुक्त डॉ. सचिन ओम्बासे यांच्या मान्यतेनुसार ही कार्यवाही करण्यात येत आहे. ऑक्टोबर २०२६ च्या वेतनासोबत सानुग्रह अनुदान आणि सण अग्रिमाची रक्कम कर्मचाऱ्यांच्या बँक खात्यात जमा करण्याचे नियोजन करण्यात आले आहे.
महापालिकेतील कायम सेवकांपैकी एस-१४ आणि त्यापेक्षा अधिक वेतनस्तर असलेले अधिकारी वगळता अन्य पात्र कायम कर्मचाऱ्यांना सानुग्रह अनुदानाचा लाभ मिळणार आहे. याशिवाय रोजंदारी, बदली आणि मानधनावरील कर्मचारी, बालवाडी शिक्षिका, सेविका तसेच शिवणवर्ग शिक्षिकांचाही यामध्ये समावेश आहे. सानुग्रह अनुदान आणि सण अग्रिमाची रक्कम दोन्ही मिळून सुमारे ४.५ कोटी रुपये खर्च अपेक्षित आहे
. ३१ मार्च २०२६ रोजी सेवेत असलेल्या आणि २०२६-२७ या आर्थिक वर्षात किमान सहा महिने सेवा केलेल्या कर्मचाऱ्यांना नियमानुसार अनुदान दिले जाणार आहे. मात्र निर्धारित निकषांनुसार सहा महिने निलंबित असलेल्या तसेच मागील आर्थिक वर्षात चार महिन्यांपेक्षा अधिक काळ गैरहजर असलेल्या कर्मचाऱ्यांना अनुदान मिळणार नाही. दिवाळीसह अन्य सणांसाठी पात्र कर्मचाऱ्यांना १२ हजार ५०० रुपयांचे सण अग्रिमही देण्यात येणार आहे. यापूर्वी घेतलेल्या अग्रिमाची परतफेड झाल्याची खात्री करूनच नवीन अग्रिम मंजूर करण्याच्या सूचना देण्यात आल्या आहेत.
रोजंदारी, बदली आणि मानधनावरील कर्मचाऱ्यांना नियमानुसार दोन कायम कर्मचाऱ्यांचा जामीन घेऊन अग्रिम दिले जाणार आहे.सर्व देयकांची अंतर्गत लेखापरीक्षकांकडून तपासणी करून ती बँकेमार्फत अदा केली जाणार आहेत. यासाठी सर्व बिल २ नोव्हेंबर २०२६ पर्यंत मुख्य लेखा अधिकारी विभागाकडे जमा करण्याचे निर्देश देण्यात आले आहेत. कर्मचाऱ्यांना दिवाळीपूर्वी या रकमा मिळतील, याची जबाबदारी संबंधित शाखा व खातेप्रमुखांवर सोपविण्यात आली आहे. विलंब झाल्यास संबंधित अधिकाऱ्यांना जबाबदार धरले जाणार असल्याचे
मुख्य लेखा व वित्त अधिकारी डॉ. रत्नराज जवळगेकर यांनी परिपत्रकात स्पष्ट केले आहे.
——–
