नालेसफाईतील कथित घोटाळ्याप्रकरणी चौकशी अहवाल आयुक्तांना सादर

सोलापूर : नालेसफाई व रेंडीकरणाच्या कामासाठी रंजित टूर्स अँड ट्रॅव्हल्सला दिलेल्या कामाच्या दरांमध्ये मोठी तफावत असताना त्यास तांत्रिक मंजुरी देणे, विभागीय मंजूर दरांचा पुरेसा विचार न करणे, तसेच कामाच्या प्रक्रियेत आवश्यक समन्वय न साधल्याचा ठपका चौकशी समितीकडून नगर अभियंता सारिका आकुलवार यांच्यावर ठेवण्यात आला आहे. तसेच नगर अभियंता,

रणजीत टूर्स अँड ट्रॅव्हल्ससह 19 कर्मचारी अधिकाऱ्यांवर  ठपका ठेवण्यात आला आहे, असे सांगतानाच याप्रकरणी संबंधितांवर फौजदारी गुन्हे दाखल करावेत अशी मागणी तक्रारदार भाजपचे नगरसेवक अनंत जाधव यांनी पत्रकार परिषदेत केली आहे.

     सोलापूर शहरातील नालेसफाई कंत्राटातील कथित घोटाळ्याप्रकरणी चौकशी करून संबंधित अधिकाऱ्यांवर कारवाई करण्याची मागणी भाजपचे नगरसेवक अनंत जाधव यांनी सभागृहात आणि निवेदनाद्वारे केली होती. याप्रकरणी कॉपी-पेस्ट बिले तयार करणे तसेच 83 लाखाची तफावत आढळून आल्याचे आरोप नगरसेवक जाधव यांनी केले होते. प्रकरणी नगर अभियंता यांना चौकशी होईपर्यंत या पदावरून दूर ठेवावेत अशी मागणी ही त्यांनी केली होती. दरम्यान महापालिका आयुक्त डॉक्टर सचिन ओंबासे यांनी याप्रकरणी चौकशी समिती नेमली होती. अतिरिक्त आयुक्त विना पवार, मुख्य लेखाधिकारी डॉ. रत्नाराज जवळगेकर, मुख्य लेखा परीक्षक सदानंद वाघमोडे आणि उपअभियंता आनंद जोशी यांच्या चौकशी समितीने आपला अहवाल महापालिका आयुक्त डॉ. सचिन ओम्बासे यांच्याकडे सादर केला आहे.

     या अहवालाची माहिती तक्रारदार अनंत जाधव यांनी आज पत्रकारांना दिली. या चौकशी अहवालातील मुद्द्यांची माहिती देतानाच या प्रकरणी ठपका ठेवण्यात आलेल्या संबंधित १९ जणांवर फौजदारी कारवाई करावी अशी मागणी ही त्यांनी केली आहे.महापालिकेच्या उपलब्ध चौकशी टिपणीनुसार, या प्रकरणात नावाने थेट जबाबदारी निश्चित करण्यात आलेल्या अधिकारी सारिका आकुलवार आहेत. मात्र रणजीत टूर्स अँड ट्रॅव्हल्स या कंत्राटदाराच्या दर व कामकाजावरही अहवालात गंभीर आक्षेप नोंदविण्यात आले आहेत.

नालेसफाईसाठी एक्स्कॅव्हेटर लॉंग बूमचा दर ४,८०० रुपये प्रतितास, तर शॉर्ट बूमसाठी ३,२०० रुपये प्रतितास असा दर मंजूर करण्यात आला. उपलब्ध विभागीय डीएसआर व अन्य मंजूर दरांच्या तुलनेत हे दर जास्त असल्याचे चौकशी टिपणीत नमूद आहे. विशेष म्हणजे कमी दरात काम करण्यास तयार असलेल्या अन्य कंत्राटदारांच्या दरांचा तुलनात्मक विचार न करता रंजित टूर्स अँड ट्रॅव्हल्सच्या दरांनाच प्राधान्य दिल्याचे निरीक्षण नोंदविण्यात आले आहे.

चौकशी टिपणीनुसार, वाहन व यंत्रसामग्रीच्या वापराबाबत दिलेल्या कामाच्या आदेशात काही वाहने समाविष्ट नसतानाही त्यांचा वापर व देयकांचा प्रस्ताव पुढे करण्यात आला. संबंधित कामासाठी आवश्यक प्रशासकीय व तांत्रिक प्रक्रिया पूर्ण करण्यापूर्वीच काही वर्कऑर्डर देण्यात आल्याचेही निदर्शनास आले. जीपीएस यंत्रणा नसणे, वाहनांच्या अनुभवाबाबत पुरेशी पडताळणी न करणे आणि बिलांच्या तपासणी प्रक्रियेत त्रुटी राहिल्याचेही टिपणीत नमूद आहे.

        सारिका आकुलवार यांनी एकूण ११ बिले रिकव्हरिंगसाठी सादर केली होती. त्यामध्ये मोठ्या रकमेची तफावत आढळून आल्यानंतर वसुलीचा प्रस्ताव मांडण्यात आला. मात्र, बिले व कामाच्या जबाबदारीबाबत वारंवार बदलणारी भूमिका, वरिष्ठांशी अपेक्षित समन्वयाचा अभाव आणि आर्थिक बचतीऐवजी अधिक दराचा प्रस्ताव स्वीकारल्याने महापालिकेच्या आर्थिक हिताला बाधा पोहोचू शकते, असे चौकशी समितीने नमूद केले आहे.

        सन 2025/26 मध्ये शहरातील आठ विभागीय कार्यालयाच्या अंतर्गत येणाऱ्या नाले सफाई मध्ये घोटाळा झाला असल्याचा प्रकार भाजपाचे नगरसेवक अनंत जाधव यांनी निदर्शनास आणून दिला होता त्यावर महानगरपालिकेचे आयुक्त यांनी चौकशी समिती नेमली असून त्याचा अहवाल नगरसेवक जाधव यांनी पत्रकार परिषदेमध्ये सादर केला. त्यानुसार या कथित नालीसफाई घोटाळा प्रकरणी 19 जणांवर ठपका ठेवण्यात आल्याचे त्यांनी सांगितले.जाधव यांच्या म्हणण्यानुसार या प्रकरणात जे कोणी दोषी असतील त्यांच्यावर कारवाई करावी तसेच त्यांच्यावर फौजदारी गुन्हा नोंद करावा असे निवेदनही आयुक्तांना दिले असल्याचे त्यांनी स्पष्ट केले. नालेसफाईची ही प्रक्रिया पूर्णपणे चुकीची असून आजवर नक्की कोणत्या दराने ही बिले काढली? आहेत याचा उल्लेख यामध्ये नाही. एकूण साडेतीन कोटींची बिले यासाठी देण्यात आलेली असून त्यापैकी एक कोटी 40 लाख रुपयांची बिले अदा करण्यात आलेली आहेत. तसेच सोलापूर महानगरपालिकेच्या इतिहासामध्ये कमी दराने हे काम घेणारा मक्तेदार उपलब्ध असला तरी अधिकच्या दराने रणजीत टूर्स अँड ट्रॅव्हल्स यांना हा मक्ता देण्यात आला. हा सर्वसामान्य जनतेचा पैसा असून या भ्रष्ट अधिकारी आणि कर्मचाऱ्यांवर फौजदारी करण्यात यावी, अशी मागणी अनंत जाधव यांनी केली आहे.