सोलापूर : सोलापूर इंडस्ट्रीज असोसिएशन आणि विद्युत निरीक्षक कार्यालय, सोलापूर यांच्या संयुक्त विद्यमाने २६ जून ते २ जुलै या कालावधीत देशभर साजरा करण्यात येणाऱ्या राष्ट्रीय विद्युत सुरक्षा सप्ताहाचा शुभारंभ शनिवारी (दि. २७) चिंचोळी औद्योगिक वसाहतीतील सोलापूर इंडस्ट्रीज असोसिएशनच्या सभागृहात उत्साहात करण्यात आला.
कार्यक्रमाच्या अध्यक्षस्थानी पुणे प्रादेशिक विद्युत निरीक्षण मंडळाचे अधीक्षक अभियंता हेमंत गांगुर्डे होते. प्रमुख अतिथी म्हणून सोलापूर इंडस्ट्रीज असोसिएशनचे उपाध्यक्ष गणेश सुत्रावे तसेच चिंचोळी एमआयडीसीचे मुख्य अग्निशमन अधिकारी दिनेश अंभोरे उपस्थित होते. यावेळी विद्युत निरीक्षक वर्षा सुतार, शाखा अभियंता भारती चव्हाण, नवाब मनुरे तसेच असोसिएशनचे कार्यकारी सदस्य कमलेश शहा, रामेश्वरी गायकवाड यांच्यासह विविध उद्योगांचे प्रतिनिधी, अधिकारी आणि कर्मचारी मोठ्या संख्येने उपस्थित होते.
यावेळी विद्युत निरीक्षक वर्षा सुतार यांनी उद्योगांमधील विद्युत सुरक्षेच्या विविध बाबींवर सविस्तर मार्गदर्शन केले. त्यांनी आरसीसीबी (RCCB) उपकरणांचे महत्त्व, विद्युत उपकरणे हाताळताना घ्यावयाची आवश्यक दक्षता, विद्युत यंत्रणांची नियमित तपासणी व देखभाल, कंट्रोल पॅनेलसमोर इन्सुलेटेड अर्थ मॅटचा वापर, २५० किलोवॅटपेक्षा अधिक भार असलेल्या उद्योगांनी विद्युत सुरक्षा अधिकाऱ्याची नियुक्ती करण्याची आवश्यकता, कार्यक्षम अर्थिंग व्यवस्था, सुरक्षित व मानकांनुसार वीज संच मांडणी तसेच वैयक्तिक सुरक्षा साधनांचा (PPE) योग्य वापर याविषयी सखोल माहिती दिली.
यावेळी अधीक्षक अभियंता हेमंत गांगुर्डे यांनी राष्ट्रीय विद्युत सुरक्षा सप्ताहाचे महत्त्व अधोरेखित करताना विद्युत निरीक्षण विभागामार्फत राबविण्यात येणाऱ्या जनजागृती मोहिमेमुळे उद्योगांमध्ये सुरक्षित कार्यपद्धती विकसित होण्यास मोठी मदत होत असल्याचे सांगितले.
सोलापूर इंडस्ट्रीज असोसिएशनचे उपाध्यक्ष गणेश सुत्रावे यांनी आपल्या मनोगतात असोसिएशन उद्योगांच्या सर्वांगीण विकासाबरोबरच सुरक्षित, शाश्वत व जबाबदार औद्योगिक कार्यसंस्कृती निर्माण करण्यासाठी सातत्याने कार्यरत असून, भविष्यातही अशा उपयुक्त जनजागृती कार्यक्रमांचे आयोजन करण्यात येईल, अशी ग्वाही दिली.
कार्यक्रमाचे सूत्रसंचालन असोसिएशनचे व्यवस्थापक शुद्धोधन गायकवाड यांनी केले, तर आभार प्रदर्शन नवाब मनुरे यांनी केले.
विद्युत सुरक्षा सप्ताहात खालील बाबींवर विशेष भर
* ईएलसीबी (ELCB) / आरसीसीबी (RCCB) बसविण्याचे महत्त्व
* कार्यक्षम अर्थिंग प्रणालीची आवश्यकता
* तीन-पिन सॉकेटचा सुरक्षित वापर
* जुनी व दोषपूर्ण वायरिंगमुळे उद्भवणारे धोके
* मुलांच्या सुरक्षित लिफ्ट वापराबाबत जनजागृती
* लिफ्टमधील ओव्हरलोडिंग टाळणे तसेच एमआरडी (MRD) व इंटरलॉक प्रणालीची माहिती
* विद्युत व उद्वाहन (Lift) संबंधीची सर्व कामे केवळ अधिकृत व पात्र ठेकेदारांकडूनच करून घेण्याचे आवाहन
