सोलापूर : महाराष्ट्रातील विविध महानगरपालिका क्षेत्रांत कार्यरत विशेष शिक्षकांच्या सेवाविषयक, प्रशासकीय तसेच संघटनात्मक प्रश्नांवर चर्चा करण्यासाठी आयोजित करण्यात आलेले राज्यस्तरीय विशेष शिक्षक चर्चासत्र सोनी महाविद्यालय, सैफुल, सोलापूर येथे उत्साहपूर्ण वातावरणात संपन्न झाले.
या चर्चासत्राच्या अध्यक्षस्थानी श्री दळवी सर (विशेष शिक्षक, पुणे महानगरपालिका) हे होते. कार्यक्रमास राज्यभरातील विविध महानगरपालिका क्षेत्रांत कार्यरत विशेष शिक्षकांनी उत्स्फूर्त प्रतिसाद देत सहभाग नोंदविला.
चर्चासत्रामध्ये विविध महानगरपालिकांमधील विशेष शिक्षकांनी आपल्या सेवेशी संबंधित अडीअडचणी, भविष्यकालीन नियोजन तसेच नियमित व वेळेवर वेतन मिळण्याबाबतच्या समस्या मांडल्या. शासनामार्फत विशेष शिक्षकांच्या वेतनाचा १०० टक्के निधी वेळेत उपलब्ध व्हावा, अशी अपेक्षा यावेळी व्यक्त करण्यात आली.
तसेच महानगरपालिका स्तरावर विशेष शिक्षकांच्या पदनिर्मितीचे प्रस्ताव सादर करण्यासाठी पाठपुरावा करावा, अशी मागणी उपस्थित शिक्षकांनी केली. विविध महानगरपालिकांमधील विशेष शिक्षकांना भेडसावणारी एक समान समस्या म्हणजे वेतन वितरणातील विलंब असल्याचे नमूद करून त्यावर राज्यस्तरावर प्रभावी तोडगा काढण्याची आवश्यकता अधोरेखित करण्यात आली.
बैठकीत दि. ८ ऑक्टोबर २०२४ च्या शासन निर्णयानुसार महानगरपालिका, जिल्हा परिषद व समग्र शिक्षण योजनेअंतर्गत कार्यरत विशेष शिक्षक नियमित सेवेत समाविष्ट झाल्यानंतर राज्यस्तरावर स्वतंत्र विशेष शिक्षक संवर्ग निर्माण करणे, तसेच सर्व विशेष शिक्षकांसाठी सेवा अटी, नियम व सुविधांमध्ये एकसमानता असावी, अशी मागणी एकमुखाने करण्यात आली. यासंदर्भातील पाठपुरावा शासन स्तरावर करण्याची विनंती उपस्थित शिक्षकांनी राज्याध्यक्षांकडे केली.
यावेळी विशेष शिक्षक संघटनेचे राज्याध्यक्ष श्री विजय देशमुख यांनी उपस्थितांना मार्गदर्शन करताना विशेष शिक्षकांच्या न्याय्य मागण्या शासन स्तरावर प्रभावीपणे मांडून महानगरपालिका अंतर्गत कार्यरत विशेष शिक्षकांना अनुकूल होईल अशा पद्धतीने पाठपुरावा करण्यात येईल, असे आश्वासन दिले.
कार्यक्रमाचे सूत्रसंचालन श्री अविनाश शिंदे (सोलापूर महानगरपालिका) यांनी केले, तर आभार प्रदर्शन श्री सचिन जाधवर (सोलापूर महानगरपालिका) यांनी केले.
या प्रसंगी संघटनेच्या कोषाध्यक्षा श्रीमती रश्मी परदेशी, श्री किशोर वैरागकर, श्री विठ्ठल वाघ, श्री शरद गावडे, श्री दत्तात्रय सोनवणे, श्री बालाजी थिटे तसेच सोलापूर महानगरपालिकेतील सर्व विशेष शिक्षक उपस्थित होते.
कार्यक्रमाच्या यशस्वी नियोजनाबद्दल राज्याध्यक्ष श्री विजय देशमुख यांनी सोलापूर महानगरपालिकेतील विशेष शिक्षकांचे विशेष कौतुक केले.
“एकजुटीतून बळ, संघटनेतून हक्क” या घोषवाक्याला साजेशा वातावरणात संपन्न झालेल्या या चर्चासत्रातून विशेष शिक्षकांच्या प्रश्नांबाबत राज्यस्तरीय पातळीवर एकत्रित भूमिका मांडण्यास बळ मिळाल्याची भावना उपस्थितांनी व्यक्त केली.
