जयपूर: राजस्थानच्या हनुमानगडमध्ये सोमवारी सकाळी मिग-२१ हे लढाऊ विमान कोसळून मोठी दुर्घटना झाली आहे. बहलोल नगर भागातील एका घरावर हे लढाऊ विमान कोसळले. या अपघातात एका महिलेचा मृत्यू झाला आहे. तर एकजण गंभीर जखमी झाला आहे, त्याची प्रकृती गंभीर आहे. हे विमान उडवमारा वैमानिक सुखरूप असल्याचं पोलिसांनी सांगितले. अपघातानंतर घटनास्थळी ग्रामस्थांची मोठी गर्दी झाली आहे. सूत्रांनी दिलेल्या माहितीनुसार, मिगने सुरतगड येथून उड्डाण केले होते.
मिग-२१ हे लढाऊ विमान कोसळण्यापूर्वी पायलट हा पॅराशूटने सुरक्षित बचावण्यात यशस्वी झाला. पण, या दुर्घटनेत एका महिलेसह दोघांचा नाहक बळी गेला तर काही ग्रामस्थ जखमी झाले आहेत. इतकंच नाही तर ज्या घरावर हे विमान कोसळलं ते पूर्णपणे जमिनदोस्त झालं आहे. आसपास विमानाचे काही भाग जळताना दिसत आहेत.
मिळालेल्या प्राथमिक माहितीनुसार, हवाई दलाच्या सुरतगड स्थानकावरून मिग-२१ या लढाऊ विमानाने उड्डाण केले होते. हवाई दलाच्या म्हणण्यानुसार, टेक ऑफ केल्यानंतर लगेचच या विमानात तांत्रिक बिघाड समोर आला. पायलटने याबाबत स्टेशनला माहिती दिली. यानंतर पायलट पॅराशूट विमानातून बाहेर पडण्यात यशस्वी झाला. मात्र, हनुमानगढ येथील सदर पोलीस स्टेशन परिसरातील एका घरावर हे विमान कोसळले. या अपघातात पायलट सुखरूप बचावला मात्र दोन ग्लामस्थांचा मृत्यू झाला. अपघाताची माहिती मिळताच हवाई दलाचे बचावकार्य सुरू झाले आहे. हेलिकॉप्टरमधून बचाव पथक घटनास्थळी पोहोचले आहे. जखमी पायलटला तातडीने रुग्णालयात दाखल करण्यात आले.
मिग-२१ १९६० मध्ये ताफ्यात सामील झालं
मिग-२१ क्रॅशच्या आजच्या घटनेने पुन्हा एकदा सोव्हिएत वंशाच्या मिग-२१ विमानांवर प्रश्नचिन्ह निर्माण केले आहे. मिग-२१ विमानांचा भारतीय हवाई दलाच्या ताफ्यात १९६० च्या दशकाच्या सुरुवातीला समावेश करण्यात आला होता आणि २०२२ पर्यंत मिग-२१ विमानांचे सुमारे २०० अपघात झाले आहेत.
मिग-२१ हे दीर्घकाळ भारतीय हवाई दलाचा मुख्य आधार होते. मात्र, विमानाचा सुरक्षेचा रेकॉर्ड अत्यंत खराब आहे. विमान अपघातातही अनेकांना जीव गमवावा लागला आहे. गेल्या वर्षी मार्चमध्ये संरक्षण राज्यमंत्री अजय भट्ट यांनी राज्यसभेत सांगितले होते की, गेल्या पाच वर्षांत तीन सेवांच्या विमान आणि हेलिकॉप्टरच्या अपघातात ४२ संरक्षण जवानांचा मृत्यू झाला आहे. गेल्या पाच वर्षांत एकूण ४५ हवाई अपघात झाले, त्यापैकी २९ IAF प्लॅटफॉर्मचा समावेश आहे.
