बारामती – वीजपुरवठा, वीजबिल व इतर वीज सेवा विषयक तक्रारी तसेच विविध ग्राहक सेवांसाठी महावितरणकडून ग्राहकांच्या सोयीसाठी विविध संपर्क व डिजिटल सेवा उपलब्ध करून देण्यात आल्या आहेत. त्यामुळे ग्राहकांना महावितरण कार्यालयात प्रत्यक्ष जाण्याची गरज कमी झाली असून, घरबसल्या अथवा मोबाईलवरून अनेक सेवांचा लाभ घेता येतो. वीज ग्राहकांनी या डिजिटल सेवांचा लाभ घ्यावा, असे महावितरणचे आवाहन आहे.
बारामती, सातारा व सोलापूर मंडळातील ९४ टक्केहून अधिक ग्राहकांनी महावितरणकडे मोबाईल क्रमांकाची नोंदणी केली आहे. उर्वरित वीज ग्राहकांनी महावितरणकडे आपला मोबाईल क्रमांक नोंदवावा तसेच विविध कारणामुळे बहुतांश ग्राहकाचे संपर्क क्रमांक बदलले असल्यास तो क्रमांक अद्ययावत करून घ्यावा. त्यासाठी महावितरण संकेतस्थळ, वेब सेल्फ सर्व्हिस, महावितरण ग्राहक मोबाईल ॲपचा वापर करावा. मोबाईल क्रमांक नोंदणीसाठी ९९३०३९९३०३ या क्रमांकावर MREG <बारा अंकी वीज ग्राहक क्रमांक> एसएमएस पाठवावा.
महावितरणच्या सर्व सेवा आता ग्राहकांच्या हातात आहेत. तेंव्हा ग्राहकांनी महावितरणच्या कार्यालयात जाण्याआधी एकदा मोबाईलमध्ये पहावे. वीजपुरवठा खंडित होणे, वीजबिलासंबंधी तक्रार, नवीन वीजजोडणी, मीटरसंबंधी समस्या किंवा अन्य सेवा व सुविधेसाठी ग्राहक मध्यवर्ती ग्राहक सेवा केंद्राच्या महावितरणच्या १८००-२३३-३४३५ किंवा १८००-२१२-३४३५ तसेच राष्ट्रीय १९१२ किंवा १९१२० या टोल फ्री क्रमांक सेवेचा किंवा customercare@mahadiscom.in या ई-मेल सेवेचा उपयोग करू शकतात. तसेच व्हॉट्सॲपद्वारे सेवेसाठी ९१६७७७७७९१ या क्रमांकावर संपर्क साधावा. ऑनलाईन वीज देयक भरणा तक्रारीसाठी helpdesk_pg@mahadiscom.in या ई-मेल आयडी सेवेचा किंवा ०२२२६४७८२४६ या क्रमांकावर संपर्क साधावा. वीज खंडितची तक्रार नोंदविण्यासाठी मिस्ड कॉल क्रमांक ०२२५०८९७१०० वर संपर्क करावा किंवा ९९३०३९९३०३ या क्रमांकावर NO POWER < बारा अंकी ग्राहक क्रमांक> असा एसएमएस पाठवावा.
महावितरणच्या www.mahadiscom.in या अधिकृत संकेतस्थळावरील ग्राहक पोर्टल , वेब सेल्फ सर्व्हिस, ऊर्जा चॅटबॉट इ. सुविधेमुळे ग्राहकांना वीजबिल पाहणे व भरणे, तक्रार नोंदविणे, अर्ज करणे, अर्जाची स्थिती तपासणे तसेच विविध ग्राहक सेवा ऑनलाइन वापरणे शक्य आहे. याशिवाय महावितरण ग्राहक मोबाईल ॲप ग्राहकांच्या दैनंदिन वीज सेवांसाठी उपयुक्त माध्यम ठरत आहे. बिलाची माहिती, ऑनलाइन वीज बिल भरणा, तक्रार नोंदणी, तक्रारीची स्थिती आणि विविध सेवांचा लाभ मोबाईलवरून घेता येतो. गुगल प्ले स्टोअर व ॲप स्टोअरवर हे ॲप उपलब्ध आहे.
ग्राहकांनी अधिकृत डिजिटल माध्यमांचा वापर करून वीज सेवा व तक्रारींसाठी संपर्क साधावा. अनधिकृत व्यक्ती किंवा बनावट लिंकपासून, बनावट संदेशापासून सावध राहावे, असे आवाहन करण्यात येत आहे. महावितरणच्या वीज सेवा आता आपल्या सोयीच्या माध्यमातून, आपल्या हातात उपलब्ध आहेत.
