सोलापूर : महापालिकेच्या चार हुतात्मा चौकातील जलतरण तलावावर इंग्रजी भाषेत लावण्यात आलेल्या नामफलकावर मराठी भाषेत “स्वातंत्र्यवीर सावरकर जलतरण तलाव” असे फलक लावुन महापालिकेच्या निषेधार्थ महाराष्ट्र नवनिर्माण सेनेच्या वतीने आंदोलन करण्यात आले.
महाराष्ट्राची राजभाषा मराठी असताना व मराठी भाषा समृद्ध करण्यासाठी स्वातंत्र्यवीर सावरकरांचं मराठी शब्दरचनेत विविध शब्दालंकार सुचविण्यात मोलाचं योगदान होते अशा थोर स्वातंत्र्यसेनानींचा असा इंग्रजीमध्ये नामोल्लेख करून सोलापूर महानगरपालिकेला विसर पडणे ही मोठी शोकांतिका असल्याचे मत पदाधिकाऱ्यांनी व्यक्त केले.
यावेळी मनसेच्या कार्यकर्त्यांनी जलतरण तलाव परिसरात आंदोलन करत, इंग्रजी नामफलकासोबत मराठी भाषेतील नामफलक तात्काळ लावण्यात यावा, अशी मागणी प्रशासनाकडे केली. मराठी भाषा, संस्कृती आणि अस्मितेचा सन्मान राखण्यासाठी शासन आणि स्थानिक प्रशासनाने सार्वजनिक ठिकाणांवरील सर्व फलकांवर मराठी भाषेचा वापर अनिवार्य करावा, असे मत आंदोलनकर्त्यांनी व्यक्त केले.
मनसेच्या पदाधिकाऱ्यांनी इशारा दिला की, प्रशासनाने तातडीने दखल घेऊन मराठी नामफलक लावला नाही, तर पक्षाच्या वतीने तीव्र आंदोलन छेडण्यात येईल असा इशारा देण्यात आला.
याप्रसंगी जिल्हाध्यक्ष विनायक महिंद्रकर, सत्तार सय्यद, निलेश भंडारे, सुभाष माने, अमर कुलकर्णी, अभिषेक रंपुरे, संतोष घोडके, जयश्री हिरेमठ, सोनाली भागानगरे, सीमा जामगावकर, समर्थ माळगे, अभिषेक इरकल, गोरक्ष उपरे, मयूर सोलनकर, वैभव रंपुरे, आदित्य मातोळी आदी उपस्थित होते.
