करमाळा – आषाढी एकादशीच्या पार्श्वभूमीवर पंढरपूरकडे जाणाऱ्या हजारो वारकऱ्यांच्या सोयी-सुविधांसाठी करमाळा नगरपरिषद प्रशासन सज्ज झाले असून, वारकऱ्यांना कोणत्याही प्रकारची गैरसोय होऊ नये यासाठी शुक्रवार, १० जुलै २०२६ रोजी विशेष नियोजन बैठकीचे आयोजन करण्यात आले आहे. नगराध्यक्षा मोहिनी संजय सावंत यांच्या अध्यक्षतेखाली आणि उपनगराध्यक्ष अतुल फंड यांच्या प्रमुख उपस्थितीत ही बैठक करमाळा नगरपरिषद कार्यालयात पार पडणार आहे.
आषाढी वारीच्या काळात करमाळा शहरातून अनेक छोट्या-मोठ्या दिंड्या पंढरपूरकडे मार्गस्थ होत असतात. विशेषतः श्री संत निवृत्ती महाराज यांच्या दिंडीत मोठ्या प्रमाणावर वारकरी सहभागी होत असल्याने शहरात वारकऱ्यांची मोठी वर्दळ असते. काही दिंड्या शहरात मुक्कामी राहतात, तर काही दिंड्या अल्प विश्रांती घेऊन पुढे मार्गस्थ होतात.
या पार्श्वभूमीवर वारकऱ्यांना निवास, पिण्याचे पाणी, स्वच्छता, शौचालय सुविधा आणि इतर मूलभूत सुविधा उपलब्ध करून देण्यासाठी नगरपरिषदेकडून युद्धपातळीवर तयारी सुरू करण्यात आली आहे.
याबाबत माहिती देताना नगराध्यक्षा मोहिनी संजय सावंत म्हणाल्या, “करमाळा शहरात येणाऱ्या प्रत्येक वारकऱ्याची योग्य ती व्यवस्था करणे ही नगरपरिषदेची जबाबदारी आहे. वारकऱ्यांचे हाल होऊ नयेत, यासाठी प्रशासन पूर्ण क्षमतेने काम करत असून सर्व विभागांना आवश्यक त्या सूचना देण्यात येणार आहेत.”
बैठकीला सर्व नगरसेवक, मुख्याधिकारी, विविध विभागांचे प्रमुख आणि कर्मचारी उपस्थित राहणार आहेत. शहरातील समाज मंदिरे, धार्मिक स्थळे आणि सार्वजनिक सभागृहे वारकऱ्यांच्या निवासासाठी सज्ज ठेवण्याबाबत निर्देश दिले जाणार आहेत. तसेच सार्वजनिक शौचालयांची तातडीने दुरुस्ती करून तेथे मुबलक पाणी उपलब्ध करून देण्यावर विशेष भर दिला जाणार आहे.
याशिवाय प्रत्येक प्रभागातील समस्या, वारकऱ्यांच्या गरजा आणि आवश्यक उपाययोजना याबाबत नगरसेवकांकडून सूचना घेऊन त्याची तातडीने अंमलबजावणी करण्याचा निर्णय बैठकीत घेतला जाणार आहे.
नगराध्यक्षा मोहिनी सावंत, उपनगराध्यक्ष अतुल फंड आणि सर्व नगरसेवकांच्या पुढाकारामुळे यंदा आषाढी वारीदरम्यान करमाळा शहरातून मार्गस्थ होणाऱ्या वारकऱ्यांना अधिक चांगल्या सुविधा उपलब्ध होणार असल्याचा विश्वास व्यक्त केला जात आहे. प्रशासनाचे हे नियोजन वारकऱ्यांसाठी निश्चितच दिलासादायक ठरणार असून, ‘अतिथी देवो भव’ या भावनेतून करमाळा शहर वारकऱ्यांच्या सेवेसाठी सज्ज झाले आहे.
