सोलापूर – २६/११ च्या मुंबई दहशतवादी हल्ल्यावर आधारित आणि ज्येष्ठ सरकारी वकील तथा खा. उज्ज्वल निकम यांच्या कायदेशीर संघर्षाची कहाणी सांगणाऱ्या ‘प्रहार’ चित्रपटाचे सोलापुरात मोफत प्रदर्शन करण्यात आले. सोलापूर ग्रीन मिशनचे संस्थापक डॉ. सूर्यप्रकाश कोठे यांच्या पुढाकाराने आयोजित या विशेष प्रदर्शनाला खासदार उज्ज्वल निकम यांची प्रमुख उपस्थिती होती.
२६ नोव्हेंबर २००८ ला मुंबईवर झालेल्या दहशतवादी हल्ल्याने संपूर्ण देश हादरला होता. या हल्ल्यातील आरोपी अजमल कसाबला कायद्याच्या चौकटीत शिक्षा मिळवून देण्यासाठी ज्येष्ठ सरकारी वकील उज्ज्वल निकम यांनी न्यायालयात महत्त्वाची भूमिका बजावली. याच संघर्षाची कहाणी ‘प्रहार : द अनटोल्ड स्टोरी ऑफ उज्ज्वल निकम’ या चित्रपटातून मांडण्यात आली आहे.
दहशतवादाविरोधातील न्यायालयीन लढा, पुराव्यांचे महत्त्व आणि संविधानाच्या चौकटीत न्याय मिळवून देण्यासाठी केलेले प्रयत्न यासोबतच उज्ज्वल निकम यांच्या कौटुंबिक आयुष्याचे भावनिक पैलूही या चित्रपटात दाखवण्यात आले आहेत. अभिनेता राजकुमार राव आणि ललित प्रभाकर यांच्या अभिनयामुळे हा चित्रपट विशेष चर्चेत आहे.
दरम्यान, सोलापूर ग्रीन मिशनचे संस्थापक डॉ. सूर्यप्रकाश कोठे यांच्या पुढाकाराने सोलापुरात वकील, पत्रकार आणि सामाजिक क्षेत्रातील मान्यवरांसाठी या चित्रपटाचे मोफत प्रदर्शन आयोजित करण्यात आले होते. या विशेष प्रदर्शनाला ज्येष्ठ सरकारी वकील तथा खासदार उज्ज्वल निकम यांची प्रमुख उपस्थिती होती.
यावेळी महापौर विनायक कोंड्याल,डॉ.सूर्यप्रकाश कोठे,भाजपच्या शहराध्यक्ष रोहिणी तडवळकर, नगरसेवक प्रथमेश कोठे आणि उद्योजक रामभाऊ जगदाळे यांच्यासह अनेक मान्यवर उपस्थित होते.
उज्ज्वल निकम यांच्या कार्याचा गौरव करताना डॉ. सूर्यप्रकाश कोठे यांनी देशाला त्यांच्या कार्याचा अभिमान असल्याची भावना व्यक्त करताना संविधानाच्या चौकटीर राहून त्यांनी क्रूरकर्मा कसाबला फासावर लटकावत देशाची मान उंचावली असे ते म्हणाले.
यावेळी बोलताना खासदार उज्ज्वल निकम यांनी २६/११ च्या खटल्यात अजमल कसाबला न्यायातलायत फाशीची शिक्षा मिळवून देण्यात आलेल्या कायदेशीर लढ्याचा उल्लेख केला. या खटल्यातून जगाला भारतीय संविधानाची ताकद दाखवून दिल्याचे त्यांनी सांगितले.
चित्रपट पाहिल्यानंतर महापौर विनायक कोंड्याल यांच्यासह उपस्थित मान्यवरांनी चित्रपटाचे कौतुक केले. देशाच्या सुरक्षेसाठी आणि न्यायासाठी लढणाऱ्या व्यक्तींचा संघर्ष समजून घेण्यासाठी प्रत्येकाने हा चित्रपट पाहावा, असे आवाहनही यावेळी करण्यात आले.
डॉ.सूर्यप्रकाश कोठेंच्या या उपक्रमाचे सर्वांनी विशेष कौतुक केलं.
