सोलापूर : भीमाशंकर अभयारण्य परिसरात प्रस्तावित टोरंट प्रकल्पाच्या पार्श्वभूमीवर सुरू असलेल्या वृक्षतोडीच्या निषेधार्थ शिवसेना उद्धव बाळासाहेब ठाकरे पक्षाच्या युवासेना सोलापूर शहर-जिल्ह्याच्या वतीने युवासेनेचे सोलापूर जिल्हाप्रमुख राम वाकसे, ग्रामीण जिल्हाप्रमुख रमेश चौगुले, युवासेनेचे शहरप्रमुख तुषार आवताडे यांच्या नेतृत्वाखाली सह्यांची मोहीम आयोजित करण्यात आली. या मोहिमेला नागरिकांचा उत्स्फूर्त प्रतिसाद मिळाला.
विकासाच्या नावाखाली पर्यावरणाची हानी होऊ नये, वनसंपत्तीचे संरक्षण व्हावे आणि निसर्गाचा समतोल कायम राहावा, या उद्देशाने युवासेनेच्या वतीने या मोहिमेचे आयोजन करण्यात आले. वृक्षतोडीमुळे पर्यावरणावर होणारे संभाव्य दुष्परिणाम लक्षात घेता, या विषयाकडे शासन आणि संबंधित प्रशासनाचे लक्ष वेधण्यासाठी सह्यांच्या माध्यमातून जनमत एकत्रित करण्याचा प्रयत्न करण्यात आला.
वृक्ष हे केवळ निसर्गाचे सौंदर्य वाढवणारे घटक नसून ते पर्यावरणाचा समतोल राखण्यासाठी, जैवविविधतेचे संवर्धन करण्यासाठी आणि भावी पिढ्यांना सुरक्षित पर्यावरण उपलब्ध करून देण्यासाठी अत्यंत महत्त्वाचे आहेत. त्यामुळे कोणताही विकास प्रकल्प राबविताना पर्यावरणाचे संरक्षण, वन्यजीवांचे अधिवास आणि नैसर्गिक संपत्ती यांचा गांभीर्याने विचार होणे आवश्यक आहे, अशी भूमिका यावेळी युवासेनेचे राम वाकसे यांनी मांडली.
या सह्यांच्या मोहिमेद्वारे नागरिकांना पर्यावरण संवर्धनाच्या कार्यात सहभागी होण्याचे आवाहन करण्यात आले. संकलित करण्यात आलेल्या सह्यांच्या माध्यमातून संबंधित शासन आणि प्रशासनाकडे वृक्षतोडीच्या प्रश्नावर लक्ष घालण्याची, पर्यावरणाचे नुकसान टाळण्यासाठी आवश्यक उपाययोजना करण्याची तसेच या प्रकरणाची योग्य दखल घेण्याची मागणी करण्यात येणार आहे.
“विकासाला आमचा विरोध नाही; मात्र विकासाच्या नावाखाली पर्यावरणाचा बळी दिला जाऊ नये. निसर्ग, वनसंपदा आणि भावी पिढ्यांचे भविष्य सुरक्षित ठेवण्यासाठी आवश्यक त्या उपाययोजना करण्यात याव्यात,” अशी भूमिका युवासेनेचे ग्रामीण जिल्हाप्रमुख रमेश चौगुले मांडण्यात आली.
वृक्षतोडीच्या प्रश्नावर शासन व संबंधित यंत्रणांनी गांभीर्याने विचार करून पर्यावरणाच्या दृष्टीने योग्य निर्णय घ्यावा, अशी मागणीही यावेळी करण्यात आली.
युवासेनेच्या या उपक्रमातून पर्यावरण संवर्धनाच्या प्रश्नावर जनजागृती करण्याचा प्रयत्न करण्यात आला. निसर्गाचे रक्षण, वृक्षांचे संवर्धन आणि पर्यावरणाचा समतोल राखण्यासाठी भविष्यातही अशा जनहिताच्या उपक्रमांमध्ये युवासेना अग्रभागी असेल असा विश्वास युवासेनेचे शहरप्रमुख तुषार आवताडे यांनी व्यक्त केला.
युवासेनेचे सचिन बागल, युवासेनेचे सोलापूर दक्षिणचे शहर प्रमुख दत्ता जाधव, जिल्हा समन्वयक प्रसाद माने, उपजिल्हाप्रमुख ऋषिकेश धाराशिवकर, नागनाथ सिंदगी, शहर मध्य चिटणीस प्रकाश नाईकवाडी, कॉलेज कक्षाचे समर्थ गायकवाड, नितीन काटकर, शहर उत्तर समन्वयक गोरख कणसे, दिगंबर मल्लाव, कबीर शेख, अभिषेक मॅकल, अनिल जाधव, गणेश होटकर, ॲड गणेश बनसोडे, महेश माने, ऋषिकेश जाधव, ओंकार जाधव, सिद्धाराम तरडे, नितीन भोसले, अभिजीत गव्हाणे, दिनेश माने यांच्यासहयुवासेनेचे पदाधिकारी आणि पर्यावरण प्रेमी मोठ्या संख्येने उपस्थित होते.
